Қирғизистон президенти Садир Жапаровнинг Ўзбекистонга ташрифи доирасида 16 та ҳужжат имзоланди.
Жумладан, Қирғизистоннинг Иссиқкўл вилоятида жойлашган курорт-ҳордиқ хўжалиги объектлари бўйича ҳукуматлараро битим имзоланди.
2023 йилнинг август ойида Иссиқкўлдаги собиқ “Дилором” пансионати ўзбекистонлик инвесторларга фойдаланишга топширилиши мумкинлиги ҳақида хабар берилганди. Ўзбекистон бош вазири Абдулла Ариповнинг Қирғизистонга ташрифи доирасида Ўзбекистон делегацияси “Эне-Сай” (собиқ “Дилором”) пансионатига ташриф буюриб, уни кўздан кечирган эди.
Шу билан бирга, жорий ташриф доирасида “Фуқароларнинг ўзаро келиб-кетишлари тўғрисидаги ҳукуматлараро битимга ўзгартиришлар киритиш тўғрисида баённома” ҳам имзоланди.
Маълумот учун, 2023 йилнинг май ойида Ўзбекистон—Қирғизистон чегарасидан ID карта орқали ўтишга рухсат берилган эди.
Шавкат Мирзиёев ўтган йилнинг 27 апрель куни Қирғизистон билан чегарани ID карта орқали кесиб ўтиш тўғрисидаги шартномани ратификация қилиш тўғрисидаги ҳужжатни имзолаган. 2022 йилнинг декабрь ойида Қирғизистон ва Ўзбекистон чегарани кесиб ўтишда паспорт назоратини осонлаштиришга келишиб олгани ҳақида хабар берилганди.
Бундан ташқари, “Ўзбекистон Республикасининг Жаҳон савдо ташкилотига аъзо бўлиши бўйича икки томонлама музокараларни якунлаш тўғрисида баённома” ҳам имзоланди.
Июнь ойи аввалида Шавкат Мирзиёев қатор давлат компанияларининг иқтисодий фаолият олиб бориш бўйича эксклюзив ҳуқуқларини бекор қилиш тўғрисидаги фармонга имзо чеккан эди.
Шавкат Мирзиёев 5 июнь куни Жаҳон савдо ташкилоти (ЖСТ) бош директори доктор Нгози Оконжо-Ивеалани қабул қилганди. Учрашувда Ўзбекистоннинг ЖСТга қўшилиши борасида кўрилаётган амалий чора-тадбирлар муҳокама қилинган.
Маълумот учун, Қирғизистон 1998 йилда ЖСТга аъзо бўлган.
Шунингдек, “2024-2026 йилларда Тошкент ва Бишкек шаҳарлари ўртасидаги ҳамкорликни ривожлантириш бўйича чора-тадбирлар режаси” ҳам имзоланди.
Бугун давлат раҳбари ўртасида бўлиб ўтган музокараларда ўзаро савдо ҳажмини яқин йилларда 2 миллиард доллар кўрсаткичига чиқиш учун Ўзбекистон ва Қирғизистон пойтахтларда савдо уйлари ташкил этилиши бўйича келишувга эришган эди.
Шу билан бирга, Тошкент ва Бишкекда экспорт-импорт шартномалари тўплами шакллантирилади, экспортолди молиялаштириш воситалари жорий этилади, қишлоқ хўжалиги ва чорвачилик маҳсулотларини тезкор ташиш бўйича “яшил” йўлак ишга туширилади.
Шунингдек, ташриф давомида яна қуйидаги ҳужжатлар имзоланди:
- Қурилиш фаолияти соҳасидаги ҳамкорлик тўғрисида баённома;
- Меҳнат, аҳоли бандлиги ва миграция соҳасидаги ҳамкорлик тўғрисида баённома;
- Маданият ва санъат соҳасидаги ҳамкорлик тўғрисида баённома;
- Давлат хизмати соҳасидаги ҳамкорлик тўғрисида баённома;
- 2024—2030 йилларда ўзаро савдо ҳажмини ошириш бўйича чора-тадбирлар режаси;
- 2024—2026 йилларда жисмоний тарбия ва спорт соҳасидаги ҳамкорликни ривожлантириш бўйича амалий чора-тадбирлар режаси;
- 2024—2026 йилларда қишлоқ хўжалиги ва озиқ-овқат таъминоти соҳасидаги ҳамкорликни янада ривожлантириш бўйича “йўл харитаси”;
- Ўзбекистон президенти ҳузуридаги Стратегик ва минтақалараро тадқиқотлар институти ҳамда Қирғизистон президенти ҳузуридаги Стратегик ташаббуслар миллий институти ўртасидаги меморандум ва бошқалар.
Изоҳ (0)