Қирғизистонда Ўзбекистондан келган қурилиш мутахассисларига маҳаллий кадрларга қараганда 50 фоизга кам маош тўланмоқда. Бу ҳақда қирғизистонлик профессор берган маълумотга асосланиб, “Tazabek.кг” нашри хабар берди.
Қирғизистон иқтисод фанлари доктори, профессор Азисбек Бексултанов “Биринчи радио” нашрига берган интервьюсида маҳаллий ва хорижий ишчиларга тўланаётган ҳақ борасида фикр билдириб, Ўзбекистонлик ишчилар нисбатан кам ҳақ эвазига ишлаётгани ҳақида гапириб ўтган.
Профессорнинг сўзларига кўра, сўнгги йилларда Қирғизистонда ўзбекистонлик қурувчилар сони сезиларли даражада кўпайган. Ишчилар асосан Фарғона водийсига туташ Қирғизистон туманларига бориб қурилиш ишларида қатнашган.
“Кўпчилик таъкидлаганидек, уларнинг ишлари юқори сифатли ва эстетик дид билан қилинган, бироқ ўзбекистонликларга тўланадиган маош анча паст. Масалан, шартномага кўра, Қирғизистонда маҳаллий ишчиларга 20 минг сўм, ўзбек усталарига эса бор-йўғи 10 минг сўм маош тўланади, бу 50 фоизга арзон дегани”, деган Азис Бексултанов.
Профессор, шунингдек, мавсумий туризм фаол ривожланаётганини қайд этган. Фарғона водийси бўйлаб Қирғизистон ва Ўзбекистон туризм компаниялари тур-пакетлар ташкил этаётгани айтилган.
“Мартдан то кеч кузгача сайёҳлик компаниялари Қирғизистонда Ўзбекистонни фаол реклама қилмоқда. Бу икки давлат иқтисодиётига ижобий таъсир кўрсатмоқда. Биринчидан, фуқароларимиз — саёҳатчиларимиз Ўзбекистон иқтисодини қўллаб-қувватласа, иккинчидан, уларни жўнатаётган туризм компаниялари давлат бюджетига солиқ тўлайди, бу ҳам халқимизга, ҳам мамлакат иқтисодиётига фойда келтиради”, деган профессор.
Изоҳ (0)