Англия терма жамоаси ва “Реал” клуби ярим ҳимоячиси Жуд Беллингем елкасидан қилиниши керак бўлган операция туфайли 2024—2025 йилги мавсум бошини ўтказиб юбориши мумкин. Бу ҳақда The Athletic нашрига таяниб Мadrid Zone хабар берди.
Манбага кўра, “қироллик клуби” раҳбарияти ярим ҳимоячи мадридликлар жамоасининг муҳим ўйинларини ўтказиб юбормаслик ва Евро—2024 га бориш учун ўтган мавсумда қилиниши керак бўлган жарроҳлик амалиётини кечиктирганидан хабардор. Таъкидланишича, Беллингемнинг операциядан кейинги тикланиш даври икки ойдан уч ойгача давом этади.
Беллингем 2023 йилнинг ёзидан буён “Реал”да ўйнамоқда. Бунгача англиялик ярим ҳимоячи Дортмунднинг “Боруссия” клуби шарафини ҳимоя қилган. Ўтган мавсум охирида ҳужумкор ярим ҳимоячи “Лос Бланкос”даги дебют мавсумида 42 та ўйин ўтказиб, 23 та гол ва 13 та голли узатмани амалга оширган эди. Евро—2024 да футболчи Англия терма жамоасининг барча етти ўйинида майдонга тушиб, иккита гол ва битта голли узатмани амалга оширди. Transfermarkt интернет порталига кўра футболчининг тахминий нархи 180 миллион еврони ташкил қилади.
Изоҳ (0)