АҚШнинг собиқ президенти Дональд Трамп 14 июль куни Пенсилваниянинг Батлер шаҳридаги сайловолди митинги пайтида яраланди. Бу ҳақда BBC хабар берди.
Ҳодиса акс этган видеода унинг чиқиши чоғида ўқ овозига ўхшаш товушлар эшитилган. Шундан сўнг Трамп қулоғини ушлаб ётиб олган. Қўриқчилар шу заҳоти Трампни ўраб олди. Президентликка номзод ўрнидан турганида қулоғидан қон оқаётганини кўриш мумкин. Махсус хизмат агентлари уни қуршаб олиб, кўтарилишга ёрдам берди ва саҳнадан олиб кетди.
Трампга у чиқиш қилаётган саҳна яқинидаги бинодан ўқ узилган. Ўқ узган шахс махсус хизмат ходимлари томонидан ўлдирилган. Гумондорнинг шахси ҳақида ҳозирча маълумот йўқ. Тhe New York Times маълумотига кўра, суриштирув ишлари Махфий хизмат томонидан олиб борилмоқда, аммо унга бошқа идоралар, хусусан Федерал қидирув бюроси ҳам жалб этилади.
Махфий хизматлар вакили Трамп айни вақтда “хавфсизликда” эканини билдирди. Трампнинг сайлов кампанияси вакили ҳам собиқ президентнинг “аҳволи яхшилиги” ва маҳаллий тиббиёт муассасасида тиббий кўрикдан ўтганини маълум қилган. Батлер округи прокурорининг ёзишича, ўқ Трампни “тирнаб ўтган”. CBS News маълумотига кўра, ҳодисадан уч соат ўтиб собиқ президент шифохонани тарк этган.
Изоҳ (0)