Исроил ҳужуми рўй берган Ғазо шаҳри шарқидаги вайроналар остидан 11 июль куни 60 га яқин жасад топилган. Бу ҳақда Ғазо фуқаролик мудофааси агентлиги тарқатган хабарга асосланиб, Al Arabiya нашри маълум қилди.
Жасадлар Ғазо шаҳри шарқидаги Шужайя аҳоли пункти ҳудудидан топилган. Бу маълумотни Исроил ҳарбийлари ҳам тасдиқлаган.
Шарқий Шужайя туманида сўнгги икки ҳафта давомида фаол жанглар, портлашлар содир этилган. Исроил ҳудудда Фаластин қаршилик кучлари аъзолари жойлашганини сабаб қилиб, умумий ҳаво ҳужумлари ташкил этган.
Ғазо фуқаролик мудофааси агентлигининг маълум қилишича, Исроилнинг Шужайядаги амалиётлари оқибатида ҳудуддаги 300 дан ортиқ турар жой биноси вайрон бўлган. 100 дан ортиқ корхона ишлаб чиқаришни тўхтатган.
Шужайяда яшовчи Муҳаммад Наирийнинг айтишича, у ва бошқалар ҳарбий операциядан сўнг уйларига қайтишганда бутун аҳоли пунктининг бузиб ташланганига гувоҳ бўлишган. Вайроналар текширилганда эса уларнинг остида жасадлар борлиги маълум бўлган.
10 июль куни Исроил армияси икки ҳафталик амалиётдан сўнг Ғазо шарқини тарк этган. Танклар ва қуролли қисмлар Ғазо шаҳрининг бошқа қисмига кўчиб ўтган.
Хорижий нашрлар Ғазонинг Тел ал-Ҳава ҳудудида Фаластин қаршилик кучлари ва Исроил ҳарбийлари ўртасида оғир тўқнашувлар давом этаётганини ёзган. Қаршилик кучини синдириш учун Исроил авиацияси Сабра аҳоли пунктидаги қатор объектларга бомбалар ташлаган.
Изоҳ (0)