Мамлакатимизда ёз фасли давом этмоқда. Бундай об-ҳавода қандай кийиниш, қанча сув ичиш ва қуёш уришидан сақланиш ҳақида аввалроқ тавсиялар берган эдик. Бугунги мақолада соғлиққа хавф солиши мумкин бўлган ёзги одатларни эслатиб ўтишни лозим топдик.
Фаввораларда чўмилманг
Фавворалардаги сув мунтазам алмаштирилмайди, чунки улар чўмилиш учун мўлжалланмаган. Ёзнинг иссиқ ҳавоси эса сунъий сув ҳавзаларида бактериялар ва турли микроорганизмларнинг кўпайишига шароит яратади. Агар ичак инфекциялари ва турли юқумли касалликларга чалинишни истамасангиз, оила аъзоларингиз, айниқса, болаларингизни фаввораларда чўмилишдан қайтаринг. Фавворалар аслида шаҳар қиёфасига кўрк қўшадиган обидалардан биридир.
Ўткир ичак касалликлари ва конъюнктивит билан касалланишдан ташқари фавворалар ичида ўрнатилган чироқ, қувур ёки металлга тегиб кетиб, жиддий жароҳатлар олишингиз мумкин.
Антиперспирантлардан фойдаланишни камайтиринг
Иссиқ ҳавода организм терлаши табиий жараёндир. Шундай тарзда тана иссиқлик алмашинувини тартибга солади ва сизни қизиб кетишдан сақлайди. Агар тери орқали организмдаги ортиқча суюқликдан халос бўлишига йўл қўйилмаса, бу иссиқлик уришига олиб келиши мумкин.
Кечқурун камроқ сув ичинг
Ўртача вазнли инсон кунига икки-икки ярим литр суюқлик ичиши лозим. Мутахассислар кунлик сув эҳтиёжнинг 80 фоизини соат 17:00 га қадар, қолган 20 фоизини эса соат 21:00 гача ичишни маслаҳат беради. Маълум бўлишича, бундай тартиб буйракларга келадиган юкни камайтиради ва шишлар пайдо бўлишининг олдини олади.
Совуқ душ қабул қилманг
Эҳтимол, совуқ душ ўзингизни тетик ҳис этишингизга ёрдам берар, аммо тананинг музлаб кетиши ва гипотермия юзага келиши жиддий оқибатларга олиб келиши мумкин. Иссиқ ҳаводан уйга кириб келгач, тана бирданига совуқ сувга тушса, ҳароратдаги кескин фарқ шамоллаш келтириб чиқаради.
Жазирама ҳавода вентилятор керакциз буюмга айланади
Хонада ўта юқори ҳарорат бўлганда вентилятор салқинлик бермайди, балки иссиқ ҳавони атрофга ҳайдаб, вақтинчалик салқинлик муҳитини яратади. Бундай техника одамларда кўнгил айниши, заифлик, бош айланиши ва оғриғига сабаб бўлади. Махсус сув пуркагичли мосламага эга вентилятор бундан мустасно.
Изоҳ (0)