Ўзбекистон ва Ислом тараққиёт банки (ИTБ) ўртасида ҳамкорлик алоқалари янада жадаллаштирилади. Бу ҳақда “Дунё” ахборот агентлиги хабар берди.
Маълум қилинишича, Ўзбекистон элчиси Нодиржон Тургунов ушбу банк Лойиҳалаштириш масалалари департаменти бош директори Анас Айсам билан учрашув ўтказди. Унда Ўзбекистон ва ИTБ ўртасида ҳамкорлик алоқаларини янада жадаллаштириш, Ўзбекистонда ишлаб чиқилаётган йирик лойиҳаларни имтиёзли молиялаштириш, хотин-қизлар ва ёшларни қўллаб қувватлаш ҳамда техник-гуманитар ёрдамларни жалб қилиш масалалари муҳокама қилинди.
Томонлар транспорт, логистика, таълим, қишлоқ хўжалиги, сув, атроф-муҳит, чорвачилик, обод қишлоқ ва бошқа йўналишлардаги лойиҳаларни молиялаштириш имкониятлари бўйича фикр алмашди.
Ўзбекистонда хотин-қизлар ва ёшларни қўллаб-қувватлашга қаратилган муҳим дастурлар эътироф этилди ва уларда ИTБ иштирокини кенгайтириш имкониятлари кўриб чиқилди.
Бундан ташқари мазкур банк томонида амалга оширилаётган лойилар ижросини доимий тарзда мониторинг қилиб бориш ва келгуси қўшма лойиҳаларни муҳокама қилиш учун ИTБ вакилларининг Ўзбекистонга амалий сафарини ташкил этиш тўғрисида келишиб олинди.
2023 йилнинг апрелида Тошкент халқаро инвестиция форуми доирасида ташриф буюрган Ислом тараққиёт банки президенти Муҳаммад бин Сулаймон Шавкат Мирзиёев қабулида бўлганди. Ўзбекистон президенти ИTБ билан янги шериклик дастурини биргаликда амалга ошириш муҳимлигини қайд этиб, янги ўрта муддатли шериклик дастури доирасида банк гуруҳи билан ҳамкорликни янада кенгайтириш масалаларини муҳокама қилганди.
Изоҳ (0)