“Надомат” лойиҳасининг навбатдаги суҳбатдоши Дилором Абдукаримова айни дамда 21-сонли аёллар колониясида жазо муддатини ўтамоқда. У қотилликка қўл ургани сабаб 10 йилга озодликдан маҳрум этилган. Турмуш ўртоғининг зулмига узоқ йиллар давомида чидаб яшаган.
Маҳкума — 51 ёшда, у Жиноят кодексининг 97-моддаси (қасддан одам ўлдириш) билан озодликдан маҳрум этилган.
“Кўчаларда идиш териб, эримни боқдим”
— Ўзим кўп болали оиланинг фарзандиман. Отам ҳаёт, 89 ёшда. Биринчи турмушимдан ажрашганман, собиқ эрим гиёҳванд эди. Иккинчи марта турмуш қурдим, буниси ашаддий пиёниста бўлиб чиқди. Худонинг берган куни ичиб олиб, калтакларди. Соғ жойим қолмаган. Кўчадан пластик идишлар териб, эрим, қизим ва куёвимни боқдим. Тамаддихонада идиш-товоқ ювардим. Эрим ароққа пул бер, деб дўппосларди. Шунинг орқасидан чап қўлим ва оёғим ҳалигача қаттиқ оғрийди. Ўзи ҳам ичарди, менга ҳам мажбурлаб ичирарди, — дейди маҳкума.
“Менга ҳам мажбурлаб ароқ ичирарди”
— Бир рус қўшним 7 май куни томорқасидаги ерни чопиқ қилиб беришимни сўради. Ишларни тугатдим, синглим қўнғироқ қилиб, эртага “Қўйлиқ” бозорида бир иш бор, 150 минг сўм ҳақ тўлашар экан, борасизми, деб қолди. Майли, дедим. Эртасига эрталаб уйғонсам, ҳовлидаги супада эрим ва икки эркак ётганди, бири ўзбек, иккинчиси ўша рус қўшним эди. Кечаси ичишган экан. Тонг пайти соат 5 эди, кириб яна ухладим. Уйғониб бозорга бораман десам, эрим бормайсан, меҳмонларга қарайсан, уйда ўтир, деди. Бир тарафда тезроқ келишимни айтиб синглим қўнғироқ қиляпти. Эрим ўша икки эркак билан кўчага чиқиб кетди, бир оздан кейин ароқ ва пиво олиб келиб, ичишди.
“Ўзбекчиликда уят бўлади деб ажрашиш ҳақида ўйламаганман”
— Кундошим бор — эримнинг биринчи турмуши. Ўша куни уйида тадбир бўлаётгани учун қизим бир кун аввал ёрдамлашгани кетганди. Унга ким қўнғироқ қилиб хабар берганини билмайман, отасининг жони узилгандан кейин етиб келди.
“Бу биринчи еган калтакларим, биринчи марта зулмга учрашим эмасди, лекин ажрашиш ҳақида ўйламаганман. Ўзбекчилик деймиз, ота уйимга қандай бораман, деб сабр қилиб яшадим. Участка нозири, маҳалладагилар кўкарган юз-кўзимни кўрганда ҳам йиқилиб тушдим, деб ёлғон гапирардим. Фарзандимнинг отаси қамалиб кетишини хоҳламадим. Ҳозир кундошим қизим билан неварамни уйдан ҳайдаб юборган, кўчада қолишди. Қизим билан саккиз ой деганда кўришолдим”, дейди маҳкума.
— Меҳнатдан ҳеч қачон қочмаганман, жуда кўп ҳунарни эгаллаганман. Доим ҳалол меҳнат қилдим, бировнинг ҳаққига хиёнат қилмадим. Бу ерга келишни ҳеч кимнинг бошига солмасин, ҳеч қайси аёл бу кунларни кўрмасин, — дейди маҳкума.
Изоҳ (0)