Зеленский: “Украина бу йил урушни тугатиш бўйича батафсил режани тақдим этади”

Украина урушни тугатиш учун “аниқ ва батафсил” режани тайёрламоқда, режа шу йил тайёр бўлади.

Бу ҳақда Украина президенти Владимир Зеленский Киевда Словения президенти Наташа Пирк Мусар билан ўтказган қўшма матбуот анжуманида маълум қилди.

“Украина танлаган дипломатик йўл бизнинг ташаббусимиз, чунки биз бу урушда жабрланган томонмиз. Тинчлик саммити ўтди ва ҳозир биз учта режа устида батафсил ишлаяпмиз: энергетика, озиқ-овқат хавфсизлиги ва асирлар алмашинуви бўйича. Ишончим комилки, биз буни ҳал қиламиз. Ҳеч бўлмаганда, биз батафсил режани тайёрлаймиз ва барча ҳамкорларимизга тақдим қиламиз”, — деди Зеленский.

Шу билан бирга, Зеленский Украина дронлар, радиоэлектрон воситалар ва артиллерия ишлаб чиқаришни ошираётганини айтди.

“Чунки биз жанг майдонида кучли бўлишимиз керак...Бу иккитаси параллел нарса: жанг майдонида кучли бўлиш ва аниқ режа, батафсил режа ишлаб чиқиш...” — деди у.