Мадрид клуби 34 ёшли ҳимоячининг жамоадан кетишини эълон қилди. Аввалроқ унинг Саудиянинг “Ал-Қадисия” жамоасига ўтиши ҳақида маълумотлар пайдо бўлганди.
Начо 2001 йилдан бери “Реал Мадрид” жамоаси билан бирга. У асосий жамоада 364 та ўйин ўтказиб, 26 та совринни қўлга киритган. Футболчи клуб билан Чемпионлар Лигасида (6 марта), Клублар ўртасидаги жаҳон чемпионатида (5 марта), Испания Суперкубогида (5), Европа Суперкубогида (4), Ла Лига (4) ва Испания кубоги (2) да ғолиб чиққан.
“Начо академиямизга келганидан бери ҳамма учун ўрнак бўлиб келган ва барча “Реал Мадрид” мухлисларининг меҳрини, эътирофини ва ҳайратини қозонган. “Реал Мадрид" ҳар доим унинг уйи бўлган ва шундай бўлиб қолади”, — дейди клуб президенти Флорентино Перес.
Футболчи жамоа бош мураббийи, клубдаги жамоадошлари ва мухлисларига хайрлашув хатини ёзди.
“Мен сизга бир нечта сўзларимни бағишламоқчиман, улар ҳозирги пайтда ҳис қилаётган барча нарсани ифодалаш учун етарли эмас. Мен ҳаётимнинг бир бўлаги бўлган “Реал Мадрид” клуби билан хайрлашаман. Мен клубга 10 ёшимда келдим, шахс ва футболчи сифатида шаклландим, ғалаба қозонишни ва мағлуб бўлишни, курашиш ва азоб чекишни, завқланишни ва доимо иштиёқ ва қатъият билан яшашни ўргандим.
25 йил давомида ҳар куни бир жойга келаман, “Реал Мадрид”нинг қадриятларини ўргандим, клуб учун жонимни бердим. Бу мен учун жуда қийин. Аммо энди майдонда ҳам, майдон ташқарисида ҳам ушбу жамоанинг тимсолини намоён этиш учун қўлимдан келган барча ишни қилганимни билиб, ишонч ва хотиржамлик билан кетиш вақти келди. Болалигимда “Сантяго Бернабеу” стадионимизда ўйнашни орзу қилардим ва бугун мен 15-Чемпионлар Лигасини кўтаришга муваффақ бўлган сардор сифатида клубдан кетишга қарор қилдим.
“Реал Мадрид” ўйинчиси сифатидаги фаолиятим якуни чиройли бўлишини хоҳлардим. Ва шуни айта оламанки, бундан яхшироқ бўлиши мумкин эмас.
Президент, ёрдамингиз ва менга бўлган ишончингиз учун раҳмат.
Жамоам, сиз менинг биродарларимсиз. Жамоа сардорида бўлиши мумкин бўлган энг яхши ўйинчилар, жамоадошлар ва дўстлар.
Жаноб Карло Анчелотти, сиз ўз талабларингиз билан мени кучлироқ қилдингиз. Менга қилган ғамхўрлигингиз учун раҳмат.
“Реал Мадрид” мухлислари, сизнинг талабларингиз бизни ажойиб футболчиларга айлантиради. Ҳаммаси учун раҳмат. Сиз учун ўйнаш ва меҳрингизни ҳис қилиш мени кучлироқ қилди. Унутмайман... Охиригача!!
Йиллар давомида мен билан бирга ишлаган ва мени яхшироқ футболчи ва инсон қилган юзлаб одамларга ўз миннатдорчилигимни билдирмоқчиман. Мураббийлар, физиотерапевтлар, ходимлар, шифокорлар, мутлақо ҳамма... Катта ҳарфлар билан ёзилган RAҲМАТ.
Шу йўлда қўлимдан ушлаб, мени ҳеч қачон қўйиб юбормаган ота-онам, хотиним ва болаларим, оилам ва дўстларимга ҳам раҳмат. Баъзан бу осон бўлмади, лекин сизнинг саъй-ҳаракатларингиз ва ёрдамингиз менинг орзумни амалга оширишга ва чўққига чиқишга имкон берди.
24 йиллик фаолиятдан сўнг сизлар билан хайрлашаман.
Мени ўз клуби учун борини берган йигит сифатида эслаб қолишингизни истардим. Чин юракдан раҳмат.
Бундон буён мен клубнинг ҳар бир ғалабаси, ҳар бир унвони учун хурсанд бўлувчи содиқ мухлисга айланаман.
Тез орада кўришгунча, Мадридистлар”, — дея хайрлашув хатини якунлади Начо Фернандес.
Изоҳ (0)