Футбол бўйича Европа Чемпионатининг F гуруҳида Португалия терма жамоаси Туркия устидан йирик ҳисобда ғалаба қозонди.
Португалия термасининг ҳужумчиси Криштиану Роналду 56-дақиқада Бруну Фернандешга голли узатмани амалга оширди. Шу тариқа 39 ёш ва 138 кунлик Криштиану турнир тарихида ассистни амалга оширган энг ёши катта футболчига айланди.
Шунингдек, португалиялик футболчи ўзининг 6-Европа Чемпионатидаги 7-голли узатмасига муаллифлик қилди. Бу ҳам турнир рекорди ҳисобланади. Бундан аввал Роналду чехиялик футболчи Карел Поборски билан бир хил натижа қайд этганди (иккаласида ҳам 6 тадан ассист бор эди).
Эслатиб ўтамиз, Роналду 14 та гол билан Евролар тарихидаги энг яхши тўпурар ҳам ҳисобланади.
Криш Туркияга қарши ўйиндан сўнг яна бир рекордни қайд этди. Бу Роналду учун Европа Чемпионатларидаги 14-ғалабага (пенальтилар сериясида зафар қучилган ўйинлардан ташқари) айланди. Ҳалигача ҳеч бир футболчи ушбу мусобақада бунча кўп ғалаба қозонмаган.
Изоҳ (0)