2024 йилнинг биринчи беш ойи давомида Рақобат қўмитаси томонидан товар ёки молия бозорларида хўжалик юритувчи субъектларнинг устун мавқейини эътироф этиш бўйича кенг қамровли таҳлиллар ўтказилди.
Таҳлил натижаларига кўра, 6 та корхона турли товар ва хизматлар бўйича устун мавқега эга деб эътироф этилди. Хусусан,
- “Темирйўлэкспресс” ва “Ўзтемирйўлйўловчи” АЖ (шахслар гуруҳи сифатида) темир йўллар орқали йўловчи ташиш хизматида;
- “Шаҳар атрофида йўловчи ташиш” МЧЖ шаҳар атрофи бўйлаб йўловчи ташиш хизматида;
- JV Continaz МЧЖ формалин маҳсулотида;
- Indorama Kokand fertilizers and chemicals ҳамда “Фарғонаазот” АЖ (шахслар гуруҳи сифатида) суперфосфат маҳсулотида;
- “Фарғонаазот” АЖ карбамид маҳсулотида;
- Gazli Gas Storage МЧЖ ҚК табиий газни ер остига қуйиш, сақлаш ва тортиб олиш хизматида устунликка эга деб топилди.
Шу билан бирга, “Интертерминал” МЧЖ ҚК темир йўл линиясини ижарага бериш хизмати бўйича устун музокара кучига эга деб эътироф этилди.
“Мазкур таҳлил натижалари, Ўзбекистон иқтисодиётининг турли секторларида рақобат муҳитини янада чуқур тушуниш ва ўрганиш имконини беради. Шунингдек, бу жараёнлар тадбиркорлик субъектларига ўз фаолиятларини қайта кўриб чиқиш ва стратегияларини янгилаш имкониятини яратади.
Натижада эса бу ҳолат иқтисодиётимизнинг турли тармоқларида янги иш ўринлари яратилишига, маҳсулот ва хизматлар сифатининг ошишига ва умуман мамлакатимизнинг глобал иқтисодиётдаги мавқейини мустаҳкамлашга хизмат қилади”, — дейилади Рақобат қўмитаси хабарида.
Изоҳ (0)