“Динамо” — “Андижон” учрашуви Самарқандда бўлиб ўтади

“Динамо” клуби 2 йилдан сўнг илк бор Суперлига доирасидаги ўйинни Самарқандда қабул қилади.

ПФЛ тест тариқасида Суперлиганинг битта ўйини “Динамо” стадионида ўтишини эълон қилди:

“‘Динамo’ майдони футбол учрашувларини қабул қилиш учун тайёр. Чим, унинг остидаги дренаж ва суғориш тизимлари билан боғлиқ муаммо бартараф этилган бўлиб, эндиликда уни амалда синаб кўриш лозим.

Аввалроқ ‘Динамo’ Суперлига учрашувларидан бирини ўтказиш таклифи билан чиққан бўлиб, Лига ўрганишлар хулосаси асосида қатор камчиликларни аниқлаган ҳамда таклиф рад этилганди. Шундан кейин айрим масалаларда ижобий ўзгаришлар юз берди. Мана шу жиҳатни инобатга олиб, Суперлига 12-туридан ўрин олган ‘Динамo’ — ‘Андижон’ учрашувини Самарқанд шаҳрида ўтказиш мақсадга мувофиқ деб топилди. 

Суперлига 12-туридан ўрин олган ‘Динамo’ — ‘Андижон’ учрашуви 22 июнь куни тест тариқасида Самарқанд шаҳрида ўтказилади. ‘Динамo’ стадиони билан боғлиқ келгуси режаларга роппа-роса бир ойдан кейин аниқлик киритилади”. 

Самарқанднинг “Динамо” жамоаси жорий мавсум Суперлигада ортда қолган 11 турдан сўнг 13 очко билан 8-ўринни эгаллаб турибди.