Бугун, 14 июнда Мюнхенда Германия ва Шотландия учрашуви билан футбол бўйича Европа чемпионатининг 17-финал босқичи старт олади.
Турнирнинг очилиши “Бавария” клубининг уй аренаси — “Allianz Арена”да бўлиб ўтади.
Стадион 75 минг ўринга мўлжалланган. Мутасаддилар бугун майдон лиқ тўлишини кутмоқда. Трибунада шотландиялик мухлисларнинг нечтаси киришини аниқ айтиш қийин, бироқ турли ҳисоб-китобларга кўра,150 мингга яқин шотландлар Германияга етиб келган.
Ким қандай ҳолатда?
Немислар ўн йилдан бери соврин ютолмаяпти. 2014 йилда Бразилияда бўлиб ўтган жаҳон чемпионатида қўлга киритилган олтин медалдан сўнг, Германия охирги учта йирик турнирнинг иккитасида ҳатто гуруҳдан чиқа олмади. Ўтган йилнинг сентябрида Япониядан йирик ҳисобдаги мағлубиятдан сўнг (1:4) Ҳанси Флик ишдан бўшатилди ва унинг ўрнига “Бавария”нинг собиқ устози Юлиан Нагелсманн келди. Юлиан стартни жуда ёрқин бошлагани йўқ, аммо бу йил унинг футболчилари тўртта ўйинда учта ғалаба (шу жумладан, Франция ва Нидерландия устидан ҳам) ва битта дурангга эришди.
Шотландияга келсак, кўпчилик учун кутилмаганда терма жамоа саралаш босқичида Испания билан гуруҳда иккинчи ўринни эгаллади. Стив Кларк шогирдлари “Манчестер Сити” клубида ҳаракат қиладиган супер ҳужумчиси Эрлинг Ҳолланди бор норвегияликларни билан Европа чемпионатисиз қолдирди. Кларк шотландларни кетма-кет иккинчи марта Европа чемпионатига олиб чиққан биринчи мураббийга айланди.
Учрашувлар тарихи
Расмий ўйинлар ҳисобга олинса, Германия ва Шотландия терма жамоаларининг йўли саккиз марта “кесишган”. Немислар олтита ғалаба ва иккита дурангга 18:9 ҳисобидаги тўплар фарқи билан эришган.
Германия охирги марта 2016 йилги Европа чемпионати учун саралаш ўйини доирасида шотландлар билан тўқнаш келган. Ўшанда немислар 3:2 ҳисобида ғалаба қозонган. Учрашувда Томас Мюллер дубль қайд этган бўлса, яна бир голга Илкай Гюндоган муаллифлик қилди.
Қизиқарли фактлар
- Европа чемпионатининг тарихи давомида мезбонлар бор-йўғи уч марта турнирда ғалаба қозонган. Охирги марта бундай ҳолат 1984 йилда содир бўлган, ўшанда Мишел Платини бош мураббийлигида Франция терма жамоаси ўз уйида кубокни қўлга киритган.
- Очилиш учрашувида Европа чемпионати мезбонлари тўрт марта ғалаба қозонган. Бундай натижа Евро—2016 да кузатилган. Ўшанда Франция терма жамоаси Руминияни мағлуб этганди — 2:1.
- Мусобақалар тарихи давомида шотландлар Европа чемпиоанатининг финал босқичида уч марта иштирок этишган. Улар ҳеч қачон гуруҳдан чиқиш вазифасини бажара олмаган. Шотландлар учрашувларнинг 2 тасида ғалаба қозонган, бешта учрашувда мағлубиятга учраган ва икки дуранг қайд этган.
- Германия Евродаги иштироклар сони бўйича рекордчи ҳисобланади — бўлажак турнир немислар учун ўн тўртинчиси ҳисобланади. Немислар бош совринни уч марта қўлга киритган. Сўнгги бора бош соврин 1996 йилда немисларга насиб қилган.
Ушбу учрашув бугун, 14 июнь куни 00:00 да Зўр TV телеканали орқали тўғридан тўғри намойиш этилади.
Изоҳ (0)