Ўзбекистон миллий терма жамоаси бош мураббийи Сречко Катанес 11 июнь куни бўлиб ўтган ЖЧ—2026 саралашининг иккинчи босқичидан ўрин олган Эрон — Ўзбекистон (0:0) учрашувидан сўнг матбуот анжуманида иштирок этди.
“Натижадан хурсандман. Бир оз ҳимоявий ўйин намойиш этдик. Голли вазиятлар кам бўлди, айрим вазиятларда бизга омад кулиб боқди. Нима бўлганда ҳам кўрсатган ўйинимиздан қониқиш ҳосил қилдим. Икки жамоа ҳам “тоза футбол” ўйнади.
Одатда ўз майдонимизда ҳужумкорлик кўрсатамиз. Эроннинг 20 та ўйиндан иборат голли серияси тўхтагани бу шунчаки рақамлар холос. Бугунги баҳс натижаси у қадар муҳим эмасди, чунки кейинги босқичга муддатидан аввал йўл олган эдик. Шунга қарамасдан ҳар жабҳада рақиб билан тенгма-тенг ўйнадик. Футболчилар мен истаганимдек ҳаракат қилишди ва тактик жиҳатдан хатоликлар кузатилмади. Биринчи бўлимда Остон Ўруновнинг зарбасига бир оз аниқлик етишмади. Қийин вазиятлардан чиқиб кета олиш учун ҳар қандай вазиятга тайёр туришимиз шарт. Ўйлайманки, дуранг натижа ҳар икки жамоа учун яхши бўлди”, — дейди Ўзбекистон терма жамоаси бош мураббийи Сречко Катанес.
Маълумот учун, Ўзбекистон терма жамоаси саралашнинг иккинчи босқичини муваффақиятли якунлади. Терма жамоа 6 учрашувда 14 очко тўплади. E гуруҳидан ўрин олган жамоа рақиблар дарвозасига 13 бор йўл топди ва 4 бора ўз дарвозаси даҳлсизлигини сақлаб қола олмади. Шундай қилиб, Эрондан тўплар нисбатига кўра ортда қолган жамоа иккинчи ўрин билан учинчи босқичга йўл олди.
Изоҳ (0)