Испания суди Винисиусни ҳақорат қилган безориларни жазолади

Испания суди “Реал” ҳужумчиси Винисиус Жуниорни ирқий камситган безориларга нисбатан ҳукм чиқарди, деб хабар бермоқда Marca нашри.

Мадриддаги кўприкда Винисиус Жуниор кўринишидаги қўғирчоқни осиб қўйган тўрт фуқаро 60 минг евро миқдорида жаримага тортилди ва уларга икки йилга спорт иншоотларига кириш тақиқланди. “Атлетико Мадрид” мухлислари кўприкка “Мадрид “Реал Мадрид”дан нафратланади” ёзуви туширилган плакатни осиб қўйган ва унинг остида Винисиус футболкаси кийдирилган қора пуфланадиган қўғирчоқ осилган эди.

АС хабарига кўра, суд “Оғирлаштирувчи ҳолатлар билан ирқ асосида камситиш” моддаси бўйича айбдор деб топилган “Валенсия”нинг уч нафар мухлисини 12 ойга қамоқ жазосига ҳукм қилди, бироқ судланувчилар айбига иқрор бўлгани учун муддат 8 ойга қисқартирилган. Бундан ташқари, улар 5000 евро миқдорида жаримага тортилди ва бир йилга спорт мусобақалари ўтказиладиган майдонларга боришдан четлаштирилди. 

Прокурорлар ҳали ҳам тергов ишларини давом эттирмоқда ва Ла Лигадан ирқий зўравонликни жазолаш учун қўшимча ваколатлар сўради.