“Ўзгидромет” дам олиш кунлари қандай об-ҳаво кутилаётганини маълум қилди

“Ўзгидромет” 8—9 июнь кунларига об-ҳаво прогнозини эълон қилди.

Унга кўра, дам олиш кунлари Ўзбекистон ҳудуди бўйича ҳаво асосан бир оз булутли бўлади, ёғингарчилик кутилмайди. Фақат айрим тоғолди ва тоғли ҳудудларда кечга томон бир оз қисқа муддатли ёмғир ёғиши, момақалдироқ бўлиши мумкин.

Ҳарорат кечалари 18-23 даража, кундузи 7 июнда 32-37 даража, 8—9 июнда 34-39 даража бўлади.

Шамол шарқдан 7-12 метр/секунд тезликда эсади, шимолда ва чўл ҳудудларда 15-18 метр/секундгача кучайиши, айрим жойларда чанг-тўзон билан кузатилиши мумкин.

Тошкентда ҳаво асосан бир оз булутли бўлади, ёғингарчилик кутилмайди. Шамол шарқдан 3-8 метр/секунд тезликда эсади. Ҳарорат кечаси 19-22 даража, кундузи 7 июнда 34-36 даража, 8—9 июнда 35-38 даража бўлади.