Қозоғистон аҳолиси сони эълон қилинди

Қозоғистон Миллий статистика бюроси мамлакат аҳолиси бўйича янгиланган маълумотларни тақдим этди. Бу ҳақда “Zakon.kz” хабар берди.

Статистик маълумотларига асосан 1 май ҳолатига кўра, Қозоғистон аҳолиси 20 миллион 118 минг 478 кишини ташкил этган. Шаҳарда истиқомат қилувчилар — 12 миллион 533 минг 471 кишини, қишлоқ аҳолиси эса 7 миллион 585 минг 007 кишини ташкил этмоқда.

2024 йил бошидан буён аҳолининг умумий ўсиши 84 минг 636 нафарни ташкил қилган. Аҳоли энг зич жойлашган учта ҳудудга қуйидагилар киради:

1. Олмаота шаҳри— 2 249 370 киши,
2. Туркистон вилояти — 2 147 234 киши,
3. Олмаота вилояти — 1 540 567 киши.

Эслатиб ўтамиз, Қозоғистон аҳолиси 2024 йил 1 апрель ҳолатига кўра, 20 095 963 кишини ташкил этганди. Таққослаш учун шу даврда Ўзбекистон аҳолиси сони 36 миллион 963 минг кишидан ошган. Шундан эркаклар 18,6 миллион, аёллар сони 18,3 миллион нафардир.

Апрель бошида Ўзбекистонда аҳоли зичлиги ҳисобланганда, бир квадрат километрга ўртача 82,3 киши тўғри келган (2023 йил мос даврида 80,6 киши). Аҳоли зичлиги энг юқори ҳудуд Тошкент шаҳри (6,8 минг киши), энг паст ҳудуд эса Навоий вилояти (9,7 киши) бўлган.