Тошкент ва Хивада миллий колоритга эга шарқ бозори ташкил этилади 

Тошкент ва Хивада миллий колоритга эга шарқ бозори ташкил этилади. Бу ҳақда Президент матбуот хизмати хабар берди. 

Унга кўра, давлат раҳбари соҳа вакиллари ва тадбиркорлари билан мулоқот қилиб, уларнинг муаммолари ва таклифларини эшитди. Жумладан, мулоқотда тадбиркорлар томонидан билдирилган:

• хорижий давлатлардан келадиган пенсия ёшидаги сайёҳларнинг Ўзбекистонда олти ойгача визасиз бўлиши тартибини ишлаб чиқиш;
• камида 100 нафар хорижий иштирокчиси бўлган уч кунлик бизнес тадбирни ташкил қилганларга тадбирдан олинган даромад солиғини 50 фоизга камайтириш, қўшилган қиймат солиғининг ярмини қайтариш тизимини жорий қилиш;
• Тошкентдаги “Чорсу” бозори ва Хивада миллий колоритга эга шарқ бозорини ташкил этиш;
• болалар оромгоҳларини хусусий шериклик асосида ривожлантириш каби фикрларни чуқур ўрганиб, уларнинг ечими бўйича аниқ таклифлар киритиш топширилди.

Ўз навбатида, президент соҳани қўллаб-қувватлаш мақсадида туризмни ривожлантириш бўйича жамоатчилик кенгашини тузишни таклиф қилди. Бу ташаббус учрашувда иштирок этган туризм соҳаси вакиллари томонидан қўллаб-қувватланди.

Йиғилиш давомида мутасаддиларнинг ҳисоботлари ва режалари тингланди.