Россия ва Украина 31 май куни Бирлашган Араб Амирликлари воситачилигида 150 нафар ҳарбий асирларни ўзаро алмашган. Бу ҳақда Россия Мудофаа вазирлиги хабар берган.
Манбада айтилишича, Киев назорати остидаги ҳудудларда ҳибсга олинган 75 нафар рус аскари Москва вакилларига топширилган. Ўз навбатида, руслар ҳам 75 нафар украин аскарини озод қилган.
Ушбу тадбир уришаётган томонлар ўртасида бир неча ойлик тўхтаб қолган музокаралардан сўнг, биринчи ижобий ҳодиса сифатида кўрилган. Чунки сўнгги пайтларда Москва ва Киев ўртасида ҳар қандай алоқа узилиб қолган эди.
“Музокаралар натижасида асирликда ўлим хавфи остида бўлган 75 нафар россиялик ҳарбий Киев режими назорати остидаги ҳудуддан қайтарилди. Бирлашган Араб Амирликлари россиялик ҳарбий хизматчиларни асирликдан қайтаришда гуманитар воситачилик қилди”, — дея маълум қилинган Россия Мудофаа вазирлиги баёнотида.
Владимир Зеленский ҳам ижтимоий тармоқдаги постида жума кунги асирлар алмашинувини тасдиқлаб, мамлакат муҳим натижага эришганини, яна 75 нафар украиналик Украинага қайтганини ёзган. Президент Украина байроқларига ўралиб қайтган аскарларнинг яқинлари томонидан кутиб олингани акс этган суратларни тармоқда бўлишган.
Изоҳ (0)