Халқ банкининг Тошкент шаҳар Қатортол кўчасидаги собиқ бош офиси биноси сотуви якунланди. Объект Oasis Samarkand компаниясига 119,7 миллиард сўмга сотилди.
Бино банк кузатув кенгашининг 2024 йил бошидаги қарорига мувофиқ онлайн аукционга қўйилган, бошланғич нархи – 114 миллиард сўм бўлган. Савдо ошириб бориш услубида ўтказилган.
Аукцион 15 дақиқа давом этган, унда икки иштирокчи қатнашган. Spot нашрининг ёзишича, Oasis Samarkand таклиф берган ягона иштирокчи бўлиб, бошланғич нархдан 5 фоиз юқори нарх, 119,71 миллиард сўм таклиф билан ғолиб бўлган.
Бино 1995 йилда қурилган бўлиб, Тошкент шаҳри Чилонзор тумани Қатортол кўчасида жойлашган. Ер участкасининг умумий майдони 0,5 гектар, олти, беш ва икки қаватли учта офис биноларини ўз ичига олади. Биноларнинг умумий майдони 9242 квадрат метрни ташкил қилади. Бино билан бирга умумий қуввати 50 кВт бўлган қуёш панеллари ҳам сотилган.
.jpg)
Очиқ маълумотларга кўра, ғолиб Oasis Samarkand МЧЖ 2013 йилда Самарқанд шаҳрида ташкил қилинган. Фаолияти – ресторанлар ва озиқ-овқат маҳсулотлари етказиш бўйича хизматлар кўрсатиш, устав фонди – 2,26 миллиард сўм. Компаниянинг 100 фоиз улушдори – Далеров Амир Дилшодович.
Амир Далеров, шунингдек, Sidi Меd компанияси (Зармед диагностика маркази), Самарканд-Зармед Университети ва Nеw Теchnо Аgе таълим муассасасида ҳам улушларга эга.
Эслатиб ўтамиз, 2023 йилда Тошкент марказидаги “Алоқабанк” бош офиси ва Рақамли технологиялар вазирлигига тегишли офис бинолари аукционда умумий 387 млрд сўмга сотилганди.
Изоҳ (0)