26 май куни Арманистон пойтахти Ереванда минглаб намойишчилар мамлакат бош вазири Никол Пашинян истеъфосини талаб қилиб, намойишда иштирок этди. Бу ҳақда Deutsche Welle хабар берди.
Шунингдек, улар яқинда тўрт қишлоқни Боку назоратига ўтказилишига сабабчи бўлган Арманистон ва Озарбайжон ўртасидаги чегаранинг делимитация ва демаркация қилинишига қарши чиққан.
Тавуш епархияси раҳбари архиепископ Баграт Галстанян норозилик акцияси раҳбари сифатида иштирок этган. У Арман Апостол черкови раҳбаридан сиёсий курашда иштирок этиш нияти туфайли уни лавозимдан четлаштиришни сўраган.
“Ватан учун Тавуш” мухолифат ҳаракати уни мамлакат бош вазирилигига номзод қилиб кўрсатган. 26 май куни бўлиб ўтган митингда сўзга чиққан Галстанян Пашиняндан “маданиятли йўл билан” истеъфога чиқишни талаб қилган ва бу бош вазирнинг бунинг учун сўнгги имконияти эканлигини таъкидлаган.
Хабар қилинишича, намойишчилар шаҳарнинг марказий майдонидан Арманистон бош вазири қароргоҳигача пиёда борган. Пашинян митинг куни Ереванда эмас, мамлакат шимолидаги сув тошқини зонасида бўлган.
Худди шу куни Арманистон ички ишлар вазирлиги мамлакат шимолидаги сув тошқинлари йўллар ва кўприкларни вайрон қилгани ҳақида хабар берган эди. 230 дан ортиқ одам эвакуация қилинган, камида бир киши ҳалок бўлган. Вайронага Дебед дарёсининг тошиб кетиши сабаб бўлган.
Ҳодиса оқибатида Тбилиси ва Ереван ўртасидаги поездлар қатнови тўхтатилиб, йирик магистрал ёпилган.
Изоҳ (0)