Халқаро жиноий суд (ХЖС) прокурори Карим Хон Исроил расмийлари ва ҲАМАСнинг юқори мартабали амалдорларини ҳибсга олишга ордер бериш таклифини тушунтирди. Бу ҳақда Тhе Тimes хабар берди.
Прокурор Исроил демократик давлат ва ўзини ҳимоя қилиш ҳуқуқига эга экани, аммо ҳеч ким инсониятга қарши жиноят содир эта олмаслигини таъкидлади. Мисол тариқасида Карим Хон ХХ асрнинг иккинчи ярмида Шимолий Ирландиядаги можарони келтирди. У ирландлар собиқ бош вазир Маргарет Тетчерни ўлдиришга урингани, шунингдек, бир қанча депутатларга суиқасд уюштиришганини эслади.
“Аммо инглизлар Фолс-роудга 2000 фунтлик бомба ташлайлик, демади. Сиз бундай қилолмайсиз”, — дея тушунтирди прокурор.
У “прокурорларнинг иши дўст орттириш эмас”лигини таъкидлади ва Британия бош вазири Риши Сунакнинг Исроил расмийларини ҳибсга олиш учун ордер бериш фойдасиз бўлиши ҳақидаги сўзларига шундай изоҳ берди.
“Биз олқишлар ёки қоралашлардан қатъи назар, ўз ишимизни қилишимиз керак. Тобора қутбланиб бораётган дунёда ҳар бир боланинг, ҳар бир аёлнинг, ҳар бир фуқаронинг тенг қадрлилигини таъкидлашимиз керак ва агар буни қилмасак, биздан нима наф”, — деди Хон.
Карим Хон 20 май куни Халқаро жиноий суднинг дастлабки тергов палатасидан Исроил бош вазири Биньямин Нетаньяху, мудофаа вазири Йоав Галант ва ҲАМАСнинг уч нафар етакчисини инсониятга қарши жиноятларда айблаб ҳибсга олиш учун ордер беришни сўради. АҚШ президенти Жо Байден бу қарорни “ғайритабиий” деб атади. Буюк Британия ҳам бунга қарши чиқди. Франция ва Бельгия эса прокурор қарорини қўллаб-қувватлади.
Изоҳ (0)