Британия ОАВ маълумотларига кўра, Буюк Британия соғлиқни сақлаш вазирлиги Лондон университети коллежи билан биргаликда ёлғизлик ва жамоада орттирилган психологик муаммолардан азият чекаётган 9 ёшдан 13 ёшгача бўлган болалар ва ўсмирларга ёрдам бериш учун 4 йиллик тажриба лойиҳасини йўлга қўймоқда.
Мутахассисларнинг таъкидлашича, бу муаммолар туфайли ўсмирлар ёлғизликка чекинади, дарсларга бормай қўяди ва ҳатто, мактабни ташлаб кетишни режалаштиришади. Лойиҳада биринчи босқичда 12 та мактаб ва 100 га яқин ўсмирлар иштирок этади.
Келгуси йилда лойиҳа 30 та мактаб ва 600 нафар ўқувчини қамраб олади.
Дастур доирасида қийин вазиятга тушиб қолган ўсмирларга боғдорчилик, балиқ ови, музейларга ташриф буюриш, тасвирий санъат бўйича маҳорат дарслари ва бошқалар бўйича машғулотларни танлаш таклиф этилади. Ижтимоий терапия машғулотлари кичик гуруҳларда мутахассислар раҳбарлигида ўтказилади.
Буюк Британия Миллий статистика бошқармаси маълумотларига кўра, 2018 йилда 10-15 ёшли ўқувчиларнинг 11,3 фоизи доимий ёлғизлик туйғусидан азият чекишини айтишган. Лондон университет коллежи профессори Дейзи Фанкурнинг сўзларига кўра, “Ёшлар ўзларини ёлғиз ҳис қилганларида, уларда тушкунлик ва ёмон уйқу, иммунитетнинг пасайиши ва юрак-қон томир касалликлари каби муаммолар хавфи кескин ошади”.
Изоҳ (0)