Тайван Хитойнинг орол яқинида ўтказаётган ҳарбий машғулотлари туфайли самолётларини ҳавога кўтарди, ракета, денгиз ва қуруқлик бўлинмаларини шай ҳолатга келтирди. Бу ҳақда орол Мудофаа вазирлиги хабар берди.
Хитой ҳарбийлари Тайван атрофидаги икки кунлик машғулотлар “мустақилликка интилаётган сепаратистик кучлар учун жазо бўлишини” таъкидлаганди. Хитой армиясининг машғулотлари Тайваннинг янги президенти Лай Синдзе 21 май куни лавозимга киришганидан сўнг бошланган.
“Хитойнинг мантиқсиз провокацияси минтақавий тинчлик ва барқарорликни хавф остига қўйди”, — дейди Тайван мудофаа вазирлиги.
Шунингдек, баёнотда Тайван можарога интилмаслиги, лекин “бундан қочмаслиги” таъкидланган.
“Ҳарбий машғулотлар учун бу баҳона нафақат Тайван бўғози ҳудудида тинчлик ва барқарорликка ҳисса қўшмайди, балки унинг гегемон характерини ҳам чуқур намоён этади”, — дейилади баёнотда.
Таъкидланишича, 23 май давомида ҳарбийлар орол яқинида 50 га яқин Хитой қирувчи самолётлари ва бошқа авиатехникаларни кўрган. Улардан 35 га яқини “ҳаво ҳудудини бузган”, яъни орол Хитой билан шартли чегара деб ҳисоблаган Тайван бўғозининг ўрта чизиғини кесиб ўтган. Хитойнинг машғулотлари 23–24 май кунлари бўлиб ўтади.
Изоҳ (0)