Оролнинг қуриган тубида ўрмон экиш маркази ташкил этилади. Бу ҳақда ШҲТ ташқи ишлар вазирлари кенгашининг навбатдаги йиғилишида маълум қилинди.
“ШҲТга аъзо давлатларнинг сунъий ўрмонлар барпо этиш ва деградацияга учраган ҳудудларда ўрмон барпо этиш бўйича катта тажрибасини инобатга олиб, бугун биз Орол денгизининг қуриган туби ва чўл ҳудудларини ўрмонзорлаштириш бўйича халқаро марказни ташкил этиш таклифини илгари сурдик. Бу борада Марказий Осиё давлатларидан келган ҳамкасбларимиз бизни қўллаб-қувватлади. Ўйлайманки, келажакда бу ғояни илгари сурамиз”, — деган Қозоғистон экология ва табиий ресурслар вазири Ерлан Нисанбаев.
Мажлисда ШҲТ бош котиби Чжан Мин, Ҳиндистон, Эрон, Хитой, Қирғизистон, Покистон, Россия, Беларусь, Тожикистон ва Ўзбекистон делегациялари иштирок этди. Унда экологик муаммоларни ҳал этиш, иқлим ўзгариши, иссиқхона газлари чиқиндиларини камайтириш, чиқиндиларни самарали бошқариш ва алоҳида муҳофаза этиладиган табиий ҳудудлар соҳасида ҳамкорликни ривожлантириш бўйича биргаликдаги ҳаракатларни амалга оширишга қаратилган масалалар муҳокама қилинди.
Ерлан Нисанбаевнинг таъкидлашича, атроф-муҳит муаммоларининг чегараси йўқ, ШҲТга аъзо барча мамлакатларда ўхшаш экологик муаммолар мавжуд, уларни фақат кучларни бирлаштириш орқали биргаликда ҳал қилиш керак.
Делегация раҳбарлари ШҲТнинг 2024 йилни “Экология йили” деб эълон қилиш бўйича ҳаракатлар режасини янада тарғиб қилиш муҳимлиги ва зарурлигини таъкидлади.
ШҲТга аъзо давлатларнинг экологик муаммоларни ҳал этиш бўйича биргаликдаги ёндашувлари, ШҲТнинг 2024—2026 йилларга мўлжалланган “Яшил макон” дастурини амалга ошириш бўйича қўшма ҳаракатлар режаси, шунингдек, ташкилотга аъзо давлатларнинг 2025—2027 йилларга мўлжалланган атроф-муҳитни муҳофаза қилиш соҳасидаги ҳамкорлиги концепциясини амалга ошириш режаси тасдиқланди.
Ўзбекистон Экология, атроф-муҳитни муҳофаза қилиш ва иқлим ўзгариши вазирлиги берган маълумотга кўра, Орол денгизи тубида 2024 йили жами 150-200 минг гектар ўрмонзорлар барпо қилиш режалаштирилган.
Изоҳ (0)