Республика “Маънавият ва маърифат” маркази ҳамда Ўзбекистон маҳаллалар уюшмаси BYD HAN русумли транспорт воситасини харид қилгани ҳақида “Ревизор” Telegram канали ёзган эди.
Хабарда 603 миллион 184 минг сўмга Республика “Маънавият ва маърифат” маркази ҳамда Ўзбекистон маҳаллалар уюшмаси BYD HAN транспорт воситасини харид қилаётгани айтилган. Шунингдек, Ўзбекистон маҳаллалар уюшмасининг 630 миллион сўмга яна бир дона BYD HAN автомобилини юқорироқ нархда бошқа автосалондан харид қилаётгани қўшимча қилинган.
Ҳолат юзасидан Коррупцияга қарши курашиш агентлиги ахборот хизмати “Дарё”га изоҳ берди.
Аниқланишича, президентнинг 2017 йил 28 июлдаги “Маънавий-маърифий ишлар самарадорлигини ошириш ва соҳани ривожлантиришни янги босқичга кўтариш тўғрисида”ги қарорининг 7-банди 2-хатбошида Республика “Маънавият ва маърифат маркази” раҳбари мақоми, маиший таъминоти, тиббий ва транспорт хизматидан фойдаланиш шарт-шароитларига кўра вазирга, марказ раҳбарининг биринчи ўринбосари ва ўринбосари тегишли равишда вазирнинг биринчи ўринбосар ва ўринбосарига тенглаштирилиши белгилаб қўйилган.
Вазирлар Маҳкамасининг 2021 йил 29 апрелдаги “Давлат бошқаруви ва маҳаллий давлат ҳокимияти органларида хизмат автотранспорт воситаларидан фойдаланиш тизимини тубдан такомиллаштириш чора-тадбирлари тўғрисида”ги қарорининг 1-иловасига мувофиқ, вазирликлар ва давлат қўмиталари раҳбарларига базавий ҳисоблаш миқдорининг 2000 баравари (680 миллион сўм) гача бўлган қийматдаги хизмат автотранспорт воситасини бириктириш мумкинлиги белгиланган.
Юқоридагиларга кўра, Республика “Маънавият ва маърифат маркази” 603 млн 184 минг сўмга бир дона қора рангли BYD HAN русумли транспорт воситасини харид қилганлиги бўйича қонунбузилиши ҳолатлари аниқланмаган.
Изоҳ (0)