Қўшма Штатлар Исроил Ғазо секторида Америка қуролларини қўллаб, халқаро қонунларни бузган бўлиши мумкин, деб ҳисоблайди. Бу ҳақда тегишли манбаларга таяниб, Deutsche Welle хабар берди.
АҚШ Давлат департаментининг 10 май куни эълон қилинган ҳисоботига кўра, Исроил халқаро ҳуқуқий меъёрларга тўғри келмайдиган тарзда қурол ишлатган, дейишга асос бор. Ҳисоботда якуний хулосалар мавжуд эмас.
Ғазо секторидаги можаронинг табиати алоҳида ҳолатларга баҳо бериш ва аниқ хулосалар чиқаришни қийинлаштиради, — дейилади ҳужжатда.
Аввалроқ АҚШ президенти Жо Байден ўзининг Демократик партияси танқидчилари босими остида Ғазодаги тинч аҳолининг аҳволидан хавотирланиб, АҚШдан ҳарбий ёрдам олаётган давлатларни инсон ҳуқуқлари бўйича қонунларга риоя қилишларига кафолат беришга чақирганди.
Давлат департаменти ҳисоботида таъкидланишича, бир қатор жиддий хавотирларга қарамай, АҚШдан ҳарбий ёрдам олаётган барча давлатлар, жумладан, Исроил, Колумбия, Эрон, Кения, Нигерия, Сомали ва Украина бундай кафолатларни тақдим этиб, АҚШ уларга ҳарбий ёрдам беришда давом этишига имкон яратган.
Исроил ҳам АҚШ Конгрессига ўз кафолатларини тақдим этган.
Аммо Исроилнинг АҚШда ишлаб чиқарилган қуролларга жиддий қарамлигини ҳисобга олсак, Исроил кучлари 7 октябрь куни ҲАМАСнинг оммавий ҳужумидан сўнг халқаро ҳуқуқ бўйича ўз мажбуриятларига мос келмайдиган турли йўллар билан қурол ишлатган, деб айтишга асос бор, —дейилади давлат департаменти ҳисоботида.
Изоҳ (0)