Фарғонада маст ҳолатдаги эрини боғлаб қўйиб, унинг ўлимига сабабчи бўлган аёлга ҳукм ўқилди. Бу ҳақда Олий суд матбуот котиби хабар берди.
Фуқаро Жўрабоев нафақага чиқиб, ёши 70 га қараб кетаётган пайтда ҳам спиртли ичимлик ичишга ружу қўйган. Бунинг натижасида унинг хонадонида тез-тез жанжал содир бўлиб турган. Оиладаги охирги можаро олдидан ҳам Жўрабоев уйга яна маст ҳолатда кириб келиб, аёли билан жанжаллашган, турмуш ўртоғини ҳақорат қилган, ошхона пичоғини олиб, ўлдириш билан таҳдид қилган ҳолда ортидан қувган. Аёл томорқа томонга ўтиб яшириниб олгач, эркак кўчага чиқиб кетган ва яна спиртли ичимлик ичиб, кечки пайт қайтиб келган.
Жўрабоева турмуш ўртоғининг уйқудан уйғониб, жанжал кўтармаслиги ва яна кўчага чиқиб кетмаслигини кўзлаб, ҳовлида турган чилвир ип билан эрининг икки қўлини пастки билак соҳасидан, оёқларини сон ва тўпиғидан боғлаб қўйган.
Бир оздан кейин эркак уйғониб, оёқ-қўллари боғланганини кўрган ва бақир-чақир қилган. Турмуш ўртоғининг важоҳатидан қўрққан аёл эрининг қўл-оёқларини боғлиқлигича қолдирган.
Жўрабоева суддаги кўрсатмасида воқеалар ривожи ҳақида гапирар экан, кейинроқ арқонни ечиш учун кирганида эри хуррак отиб ухлаб ётганини, яна бир оздан кейин эса овози чиқмай қолганини маълум қилган. Бу орада аёл яқинлари ва шифокорларни ёрдамга чақирган.
Тезкор чақирув бўйича хонадонга етиб келган шифокорлар текшириб кўриб, Жўрабоевнинг вафот этганини айтган. Суд-тиббий экспертизасининг хулосасига кўра, эркакнинг ўлимига танасидаги жароҳатлар ҳамда организмда кислороднинг камайиши, карбонат ангидриднинг кўпайиши сабаб бўлган.
Ҳолат юзасидан жиноят иши очилиб, тергов ҳаракатлари олиб борилгач, иш судда кўриб чиқилган ва аёлга нисбатан 2 йил муддатга озодликни чеклаш жазоси тайинланган.
Бундан олдин Андижон вилоятида шаръий никоҳдаги турмуш ўртоғини синтетик ип ёрдамида бўғиб ўлдирган ва мурдасини уйининг ҳожатхонаси чуқурига ташлаб юборган 25 ёшли аёлга суд ҳукми ўқилганди.
Изоҳ (0)