Колумбияда мухлис футболчига пичоқ улоқтирди

Колумбия чемпионати футбол учрашувида фожиа юз бериши мумкин эди.

“Атлетико Насиональ” футболчиси Пабло Сеппелини Колумбия чемпионати доирасида “Индепендьенте Медельин”га қарши ўйинда (2:2) жароҳат олди.

Иккинчи бўлимда қўшиб берилган вақтда Сеппелини бурчак тўпини амалга оширишга тайёрланаётган вақтда мухлислардан бири футболчига пичоқ улоқтирди. Пичоқ футболчининг бошига теккан, у йиқилиб тушган ва ҳакам ўйинни тўхтатган.

Жабрланувчига ёрдам кўрсатилиб, футболчиларнинг розилиги билан ўйин давом эттирилган. Паблонинг хабар беришича, унда озгина қон кетиши ва шиш пайдо бўлган. Жароҳат шифокор кўриги ёки чандиқни тикишни талаб қилмаган. 

Учрашувга тахминан 30 897 томошабин ташриф буюрган ва бу воқеа футбол жамоатчилигида кенг муҳокамаларга сабаб бўлди. “Атлетико Насиональ” клуби воқеадан норозилигини билдирди ва айбдорларга нисбатан қаттиқ чоралар кўрилишини талаб қилмоқда.

Колумбия футбол расмийлари ва ҳуқуқ-тартибот идоралари ушбу ҳолат юзасидан текширув ўтказмоқда. Воқеа футбол ўйинларидаги хавфсизлик ҳамда футболчилар ва томошабинларни бундай ҳодисалардан ҳимоя қилиш учун қўшимча чоралар кўриш зарурлиги ҳақида саволлар туғдирмоқда.