Хабарингиз бор, Ўзбекистонда 68 нафар боланинг ўлими ва 16 нафар боланинг ногирон бўлиб қолишига сабаб бўлган “Док-1 Макс” иши бўйича дастлабки ҳукмдан норозиларнинг судга киритган апелляциясига кўра, яна суд мажлиси бошланганди. Судья Музаффар Аҳмедов раислигидаги судлов ҳайъати томонидан кўриб чиқилаётган иш 15 апрель куни адвокатлардан бирининг келмагани боис яна қолдирилганди.
Адвокат Даврон Аҳмадов ўтган сафарги суд мажлисида видеоконференсалоқа тизими орқали суд мажлисига боғланишга уринганини, бироқ тизим ишламаганини билдирди. Адвокатга кўра, у суд мажлисига видеоконференсалоқа орқали боғланмоқчилигини айтган. Аммо судлов ҳайъати ёрдамчиси бу ҳақда судга маълум қилмаган. Шу сабаб адвокат сабабсиз судга келмади деган маълумот киритилган.
Мени судга келмади деб, баённома расмийлаштирилган. Қандай қилиб мен келмай қолган бўлишим мумкин? Суд котибига мажлисга ВКС орқали иштирок этишимни айтгандим. Шу сабаб суд ҳайъати ёрдамчисини суд мажлиси баённомасини сохталаштиришда айблаб, жиноят иши очиш ҳақида прокуратурага хабар беришни сўрайман. Ҳимоям остидаги судланувчининг ҳимоя ҳуқуқи таъминланмаган, — деди адвокат.
Судлов ҳайъати бу илтимосномани рад этди.
Адвокат шунингдек, судлов ҳайъати ва суд котибига раддия ҳам билдирди.
Қолаверса, ҳимоячи судлов ҳайъати ёрдамчиси Давлат Олимовга интизомий жазо берилишини сўради ва бу ҳақда Жиноят ишлари бўйича Тошкент шаҳар суди раисига маълумот киритилишини талаб қилди. Суд илтимосномаларни рад қилди.
Изоҳ (0)