Ижтимоий тармоқларда сартарош мижоз сифатида келган йигитнинг сочини жаҳл устида калга олиб ташлагани акс этган видеолар тарқалгач, сартарош узр сўраб чиққан эди. Вилоят ИИББга кўра, унга суд ҳукми ўқилди.
Видеода йигит соч ва соқолини қандай олишни нотўғри тушунтиргани учун сартарошнинг жаҳли чиққанини ва калга олиш орқали ундан қасд олганини кўриш мумкин. Шунингдек, сартарош бу ишни қилишдан олдин ундан нима ишда ишлашини сўраб олган. Йигит бобосининг қўлида ишлашини айтган.
“Кимни чақирасан энди, бувингни чақирасанми?” — деган сартарош. Йигит шунда ҳам ундан узр сўраган ва адашганини айтган.
Сартарош эса қилган ишига қуйидагича изоҳ берди ва узр сўради: “Хизмат вақтимда менга нотаниш бўлган фуқаро соч олдириш учун келди. Сочингни олайми, соқолингними, деб 3-4 марта сўрадим. У сочимни олинг, соқолимни олинг, деди. Жаҳл устида қизишиб кетиб калга олиб ташладим. Ундан, ота-онаси, ака-укалари, яқинларидан узр сўрайман. Ҳолат бўйича ҳар қандай жазога розиман. Қилган ишимдан пушаймонман. Ўзбекистон халқидан узр сўрайман”.
Жиноят ишлари бўйича Тошкент туманида ўтказилган суд мажлисида сартарошга нисбатан Маъмурий жавобгарлик тўғрисидаги кодекснинг 183-моддасига асосан 10 сутка маъмурий қамоқ жазоси, жараённи видеога олган шахсга нисбатан эса МЖтКнинг 46-2-моддасига асосан маъмурий жарима жазоси қўлланилди.
Изоҳ (0)