Исроил Мадримов Теренс Кроуфордга қарши рингга кўтарилади

Теренс Кроуфорд навбатдаги жангини Исроил Мадримовга қарши ўтказади.

Ярим ўрта вазн (66,7 кг.гача) тоифасида WBC, WBO ва WBA чемпионлик камарлари соҳиби Теренс Кроуфорд навбатдаги жангини Исроил Мадримовга қарши ўтказади.

Бу ҳақда ESPN телеканали вазиятга яқин манбаларга таянган ҳолда хабар бермоқда. Ўзбекистонлик боксчи биринчи ўрта вазн (69,9 кг.гача) тоифасида WBA чемпиони бўлиб турибди. ESPN берган хабарга кўра, ушбу жанг 3 август куни АҚШнинг Калифорния штати Лос-Анжелес шаҳрида бўлиб ўтади. 

Маълумот учун, ўтган йилнинг 30 июль куни Кроуфорд ҳамюрти Эррол Спенсни тўққизинчи раундда техник нокаутга учратиб, ярим ўрта вазн тоифасида мутлақ жаҳон чемпионига айланган эди.

Америкалик чемпион профессионал рингда ўтказган 40 та жангининг барчасида ғалаба қозонган. Ғалабаларининг 31 тасига нокаут орқали эришган.

Эслатиб ўтамиз, Исроил Мадримов 8 март оқшомида Саудия Арабистонининг Ар-Риёд шаҳрида россиялик Магомед Курбановни 5-раундда нокаутга учратиб, WBA камарини қўлга киритганди.