Ўзбекистонда март ойида 96,5 мингта енгил автомобиллар сотилди, бу ўтган ойга нисбатан 12,1 фоизга кам. Бу ҳақда Иқтисодий тадқиқотлар ва ислоҳотлар маркази “Дарё”га тақдим этган таҳлилида келтирилган.
Қайд этилишича, кетма-кет учинчи ойдирки, автомобиль бозорида фаолликнинг пасайиши кузатилмоқда. Фақат енгил электромобиллар сегментида бир оз ўсиш қайд этилган. Март ойи якунларига кўра, мамлакатда автотранспорт воситаларининг умумий савдоси деярли 109 минг донани ташкил этган. Умуман олганда, автомобиль бозори ой давомида 5,8 фоизга камайган.
Ҳудудлар бўйича Сурхондарё, Фарғона ва Навоий вилоятларида енгил автомобиллар бозорида савдо ҳажмининг энг катта пасайиш қайд этилган. 2024 йилнинг I чораги якунларига кўра, енгил автомобиллар савдоси 3,2 фоизга қисқариб, 334,3 мингта автомобилни ташкил этган.
Бирламчи автомобиль бозоридаги вазият
Март ойи давомида сотувлар 16,7 фоизга камайган ҳолда 24 мингдан ортиқ автомобилни ташкил этган. Ўтган йилга нисбатан автомобиль бозорининг ушбу сегменти 0,2 фоизга бир оз ўсган.
Шу билан бирга, ой давомида мамлакатда ишлаб чиқарилган 19,54 мингта енгил автомобиллари сотилган, бу ўтган йилнинг март ойига нисбатан 17,2 фоизга кам.
Хорижда ишлаб чиқарилган енгил автомобиллар сегменти
Ой давомида хорижда ишлаб чиқарилган автомобиль бозори савдоси 13,7 фоизга пасайган. Мартда жами 2,3 мингта хорижий автомобиллар сотилган. Ўтган йилнинг март ойига нисбатан сотувлар 20 фоизга камайган.
Иккиламчи бозорда сотувлар эса 10,6 фоизга камайган. Март ойида жами 74,6 мингта ҳайдалган енгил автомобиллар сотилган. Йиллик кўрсаткичларда 16 фоизга сезиларли пасайиш кузатилган.
Электромобильлар бозоридаги вазият
Электромобильлар бозори мўтадиллаша бошлаган. Шундай қилиб, март ойида енгил электромобиллар савдоси атиги 0,1 фоизга ошган. Бироқ йиллик ҳисобда сотувлар 2,4 баробар ошган. 2024 йилнинг I чораги якунларига кўра, савдо ҳажми ҳам 3,7 баробарга кўпайиб, 8 мингта автомбилдан ошган.
- Аввалроқ UzAutoMotors 2023 йилда ишлаб чиқарган енгил автомобилларнинг 118 093 донаси Cobalt ҳиссасига тўғри келгани ва бу бошқа русумлар ичида энг кўп миқдор экани хабар қилинганди.
- Эслатиб ўтамиз, компания 2023 йил 25–27 декабрь кунлари Cobalt, Damas ва Labo автомобиллари учун жами 171 минг 200 дан ортиқ онлайн шартномалар тузди.
- Мазкур автомобиллар 2024 йилда ишлаб чиқарилиши ва мижозларга етказилиши режалаштирилган.
Изоҳ (0)