Кейинги мавсумда А Сериянинг 5 та клуби Чемпионлар Лигасида иштирок этади.
Мусобақанинг янги форматида ҳозиргидек 32 эмас, 36 та жамоа иштирок этади. Қўшимча 4 та квотадан 2 таси УЕФА коэффициентлар жадвалида клублари энг яхши натижа кўрсатган лигалар ўртасида тақсимланади.
Италиянинг “Рома” ҳамда “Аталанта” клублари Европа Лигаси ярим финалига, “Фиорентина” жамоаси эса Конференциялар Лигаси ярим финалига йўл олди. Ушбу натижа сабаб Италия футбол федерацияси биринчи бўлиб Чемпионлар Лигасида қўшимча ўринни қўлга киритди. Иккинчи йўлланма учун Германия ва Англия клублари кураш олиб боради.
Маълумотларга таянадиган бўлсак, Италиянинг 6 клубига ЧЛ йўлланмаси берилиши мумкин. Бунинг учун италияликлар Европа Лигасида ғалаба қозониши, ғолиб эса мавсумни А Серияда тўртинчи ўриндан пастда якунлаши керак. Айни пайтда Италия чемпионатида бешинчи ва олтинчи ўринларни эгаллаб турган “Рома” ва “Аталанта” айнан шундай йўлланмаларга эга чиқиши мумкин.
Изоҳ (0)