Эроннинг 14 апрелга ўтар кечаси уюштирган ҳаво ҳужуми Исроилга “уруш эълон қилиш”дир. Бу ҳақда мамлакат президенти Исаак Герцогга таяниб, The Times of Israel хабар берди.
Унинг таъкидлашича, Исроил ҳозирда ҳужумга жавоб беришнинг “барча вариантларини кўриб чиқмоқда”, лекин уруш қидирмаяпти.
“Ҳозирда биз ўзимизни тийганимиз, оқибатларини билганимиз ва буни ҳамкорларимиз билан муҳокама қилаётганимиз учун барча вариантларни кўриб чиқмоқдамиз ва халқимизни ҳимоя қилиш учун зарур чораларни кўришимизга тўлиқ ишонаман. Биз уруш қидирмаяпмиз”, — деб таъкидлади Герцог.
Исроил президенти Эроннинг ҳужуми Теҳрон “бутун дунё бўйлаб тартибсизлик, террор ва беқарорликни қандай тарқатаётганига” яна бир мисол бўлишини даъво қилди.
“Дунё Теҳрондаги ёвуз империяга қарши туриш ва Эрон режимига буни эътибордан четда қолдира олмаслигини тушунтириш вақти келди”, — деди у.
Эроннинг Исроилга ҳужуми ва сабаб
14 апрель куни Эрон тунда 300 дан ортиқ дрон, қанотли ракеталар ва баллистик ракеталар билан Исроилга ҳужум қилди. Бунга Исроилнинг Дамашқдаги Эрон консуллигига 1 апрель куни берган авиазарбаси сабаб бўлди. Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди Ҳожи Раҳимий ва яна беш эронлик зобит ҳам ҳалок бўлганди. Шунингдек, уч нафар Сурия ва бир нафар Ливан фуқароси вафот этган.
Ҳолат юзасидан АҚШ разведкаси Исроилни Эрон томонидан қасос ҳужуми бўлишидан огоҳлантирди, Байден Исроилни доим қўллаб-қувватлашини билдириб, Эронни ҳужум қилмасликка чақирди. Бунга жавобан Эрон агар америкалик ҳарбийлар Исроил томонда уларга қарши жанг қилса, нишонга олинишларидан огоҳлантирди. Ўз навбатида, АҚШ ҳарбийлари ҳафта охирида Эрон ва Ямандан Исроилга учирилган 80 дан ортиқ дронни уриб туширди. Улар орасида камида олти баллистик ракета ҳам бўлгани маълум қилинди.
Исроил армиясининг даъво қилишича, 14 апрель куни мамлакатга яқинлашаётган ракета ва дронларнинг 99 фоизи Arrow узоқ масофали ракетага қарши мудофаа тизими ва қирувчи самолётлар томонидан йўқ қилинган. Эрон ҳарбий штаб-квартираси ҳужумни “муваффақиятлироқ” деб атади ва жавоб ҳужуми бўлган тақдирда “каттароқ куч билан” зарба беришни ваъда қилди.
Изоҳ (0)