Ўзбекистон Божхона қўмитасининг Россиядаги вакили ўз фаолиятини бошлади. Бу ҳақда қўмита матбуот хизмати хабар берди.
2022 йилнинг 2 декабрида Самарқанд шаҳрида бўлиб ўтган Ўзбекистон ва Россия ҳукумат раҳбарлари даражасидаги қўшма комиссиянинг 3-мажлиси доирасида икки мамлакат божхона хизмати раҳбарлари Ўзбекистон ва Россияда божхона хизматлари ваколатхоналарини очиш тўғрисида битим имзолаган.
Қайд этилишича, мазкур битим амалга ошиб, Ўзбекистоннинг Россиядаги фавқулодда ва мухтор элчиси Ботиржон Асадов, Божхона қўмитасининг Россиядаги вакили этиб тайинланган Зафар Сангинов ва Россия федерал божхона хизмати раҳбари Руслан Давидов иштирокида учрашув бўлиб ўтган.
Учрашув давомида томонлар савдо-иқтисодий ҳамкорликнинг кенг кўламли масалаларини муҳокама қилган. Таҳлилларга кўра, 2016 йилдан бошлаб Ўзбекистон ва Россия ўртасидаги товар айирбошлаш ҳажми йилига 15-20 фоизга ўсиб бормоқда.
Ўзбекистон Божхона қўмитаси вакилининг Россияда иш бошлаши божхона хизматлари ўртасидаги ҳамкорликни мувофиқлаштириш ва фаоллаштиришга хизмат қилади. Ўзбекистон билан Россия ўртасида товарлар ва транспорт воситаларининг эркин ўтишига тўсқинлик қиладиган сабабларни баҳолаш, аниқлаш ва жойида бартараф этиш имконини беради, — дейилади хабарда.
Эслатиб ўтамиз, январь ўрталарида “Ўзбекистон Республикаси давлат божхона хизмати органларининг шахсий таркиби ҳамда уларнинг оила аъзоларини ижтимоий ҳимоя қилиш тизимини тартибга солиш тўғрисида”ги Вазирлар Маҳкамаси қарори қабул қилинганди.
Изоҳ (0)