Кеча, 4 апрель куни Эрон Ислом Республикасининг Ўзбекистондаги мухтор элчиси Муҳаммад Али Искандарий маҳаллий оммавий ахборот воситалари ва журналистлар билан учрашиб, Эрон-Ўзбекистон ўртасидаги муносабатлар ва Яқин Шарқда кечаётган геосиёсий вазият ҳақида гапириб ўтди.
Муҳаммад Али Искандарийнинг таъкидлашича, Исроил амалга ошираётган ишлари нотўғри эканлигини жаҳон ҳамжамияти энди тушуниб етмоқда.
“Бундан 45 йил аввал бизнинг раҳбаримиз Оятуллоҳ Хоманаий муборак рамазон ойининг охирги жума кунини Муқаддас Қуддус куни деб эълон қилган эди. 45 йил олдин Исроилнинг Фаластинда амалга ошираётган жиноятлари ҳақида Эрон Ислом Республикаси бонг урганди. Бугун дунёнинг барча мамлакатлари Исроилнинг жиноятларини тан олмоқда. Фаластин масаласи БМТнинг Хавфсизлик кенгашида муҳокама қилинишига 45 йил вақт кетди. Исроил бир ҳафта ичида Фаластиндаги тинч аҳоли бошига 6 мингдан ортиқ бомба ёғдирган эди. Бунинг оқибатида Фаластин халқи жуда катта жабр кўрди.
Исроилнинг қилаётган ишлари нотўғри эканлигини жаҳон ҳамжамияти энди тушуниб етди. Фаластин халқининг бошига тушган кулфат Биринчи ва Иккинчи жаҳон уруши даврида кўрилган талафотлардан кўпроқдир. Исроил қўл урмаган ҳеч бир жиноят қолмади. Исроил муқаддас китоблардаги барча нарсаларни ўчириб ташлади. Маълумотларга кўра, Исроилнинг ҳарбий амалиёти давомида 120 мингдан ошиқ тинч аҳоли қурбон бўлган. Қурбон бўлганларнинг 70 фоизини болалар ва аёллар ташкил қилади”, — деди Муҳаммад Али Искандарий.
Эрон Ислом Республикаси элчисининг қўшимча қилишича, Эрон Фаластинда ҳақиқий адолат ўрнатилишини истайди.
АҚШ сўнгги русумдаги қуролларни Исроилга етказиб берди. Лекин Фаластинда ҳатто қурол сотиб олишга имконият йўқ эди. Исроилнинг йиллар давомида амалга ошириб келган жиноятларига жаҳон ҳамжамияти томонидан ҳеч қандай жавоб бўлмади. Эрон Ислом Республикаси Фаластинда ҳақиқий адолат ўрнатилишини истайди. У ерда бизнинг ҳеч қандай иқтисодий манфаатларимиз йўқ. Исроил давлатининг ичида бўлиниш мавжуд, бу мамлакат яқин орада таназзулга юз тутади. Улкан ҳарбий қудратга эга бўлган Исроил 7 минг нафар ҲАМАС жангариларини мағлуб эта олмади. Ўргимчак ўз уясининг охирги қисмига етиб келмоқда ва у ўз тўрига ўралиб, нобуд бўлади. Иншооллоҳ, биз Исроилнинг қулашига гувоҳ бўламиз. Албатта, Фаластин мамлакати ўз ҳуқуқларига эга бўлади”, — деди Эрон Ислом Республикасининг Ўзбекистондаги мухтор элчиси.
Маълумот ўрнида, жорий йилнинг 1 апрель куни тунда Исроил ҳарбий-ҳаво кучлари Сурия пойтахти Дамашқ шаҳрида жойлашган Эрон элчихонаси ва консуллигига ракета зарбасини амалга оширди. Эрон ташқи ишлар вазири Ҳусайн Амир Абдуллаҳиён мазкур ҳужум муносабати билан Америка жавобгарликка тортилиши кераклигини айтди. Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди Ҳожи Раҳимий ва яна беш нафар эронлик зобит ҳам ҳалок бўлган.
Ўзбекистон Ташқи ишлар вазирлиги бир неча инсонларнинг қурбон бўлиши ва Эроннинг Дамашқ (Сурия) шаҳридаги дипломатик миссияси ҳудудида вайронагарчиликларга олиб келган Эрон консуллиги биносига уюштирилган ҳаво ҳужумини кескин қоралади.
Изоҳ (0)