Россия Ташқи ишлар вазирлиги “Шимолий оқим” газ қувурида “уюштирилган қўпорувчилик ҳаракати” юзасидан шаффоф тергов ўтказишни талаб қилди. Вазирлик баёноти ҳақида батафсил “ТАСС” нашри хабар берди.
Россия Ташқи ишлар вазирлиги матбуот котиби Мария Захарованинг сўзларига кўра, АҚШ президенти Жо Байден маъмурияти “Шимолий оқим” портлашларидан энг кўп фойда кўрадиган томон бўлган. Россиянинг мустақил тарзда олиб борган текширувлари шунга ишора қилган.
“Тергов натижаларини кутамиз. Ғарб терговни якунлай олмаган тақдирда ҳам, биз унинг давом этишини кузатиб борамиз. Халқаро майдонда биз шаффофлик зарурлигини доимий равишда таъкидлашда давом этамиз”, — деган Захарова.
Россия расмийси билдиришича, санкциялардан олдинги даврда Россия ва Европа Иттифоқи давлатлари иқтисодий соҳада, шу жумладан, энергетика соҳасида ҳақиқий ва амалий интеграцияни йўлга қўйиб, ажойиб натижаларга эришган эди. Қўшма Штатлар эса геосиёсий мақсадларига эришиш учун бу ҳамкорликни нишонга олишни мақсад қилган.
Nord Stream AG компанияси 2022 йил 27 сентябрь куни “Шимолий оқим 1” ва “Шимолий оқим 2” газ қувурларининг учта ўтказув қисми портлашлар оқибатида жиддий шикастланганини маълум қилган эди. Швециялик сейсмологлар 26 сентябрь куни “Шимолий оқим” қувурлари бўйлаб иккита портлаш юзага келганини қайд этган. Ушбу воқеалардан кейин Россия Бош прокуратураси қувурларга етказилган зарар юзасидан халқаро террорчилик акти бўйича иш очди.
Изоҳ (0)