Америкалик бизнесмен Илон Маскнинг SpaceX компанияси Америка разведкаси билан жосуслик сунъий йўлдошларининг янги тармоғини яратиш бўйича 1,8 миллиард долларлик шартнома имзолади, деб хабар берди Reuters.
SpaceX АҚШ Миллий космик разведка бошқармаси (NRO) билан махфий шартнома асосида юзлаб разведка йўлдошлари тармоғини яратиш устида ишламоқда.
Хабарга кўра, лойиҳа SpaceX’нинг Starshield деб номланган бўлими томонидан амалга оширилмоқда, 1,8 миллиард долларлик тегишли шартнома 2021 йилда NRO билан имзоланган.
Агар дастур муваффақиятли бўлса, АҚШ маъмурияти ва қуролли кучларининг дунёнинг деярли исталган нуқтасида потенциал нишонларни тезда аниқлаш имкониятлари сезиларли даражада кенгаяди, — дея таъкидлайди Reuters.
Февраль ойида The Wall Street Journal номаълум разведка агентлиги билан 1,8 миллиард долларлик Starshield махфий шартномаси мавжудлиги ҳақида хабар берган эди. Бироқ дастурнинг мақсадлари ошкор этилмаган.
Янги паст орбитали сунъий йўлдошлар тармоғи қачон ишга тушиши ҳамда лойиҳада яна қайси компаниялар ўз шартномалари билан иштирок этаётгани аниқ эмас.
Изоҳ (0)