Роналду йиғлаган оқшом. “Ан-Насср” пенальтилар сериясида “Ал-Айн”га мағлуб бўлиб, ОЧЛ чорак финалида ўз юришини тўхтатди

Футбол бўйича Осиё Чемпионлар Лигасининг чорак финал жавоб учрашувида “Ан-Насср” 11 март, душанба куни “Ал-Айн”га қарши баҳс олиб борди. 

Учрашувнинг 28-дақиқасида БАА клуби футболчиси Раҳими ҳисобни очди. 45-дақиқада эса Раҳими яна бир бор дарвозани ишғол қилиб, дублни расмийлаштирди. Бўлим якунида эса Ар-Риёд клуби аъзоси Ғариб ҳисобни қисқартиришга муваффақ бўлди.

Иккинчи бўлим бошида эса “Ал-Айн” футболчиси Эиса ўз дарвозасига гол уриб, ҳисоб 2:2 бўлишига сабабчи бўлди. 72-дақиқада эса Теллес “Ан-Насср”нинг 3-голига муаллифлик қилиб, икки ўйин натижасига кўра, ҳисобни тенглаштирди. Қайд этиб ўтиш жоиз, жамоалар ўртасидаги дастлабки ўйинда “Ал-Айн” 1:0 ҳисобида ғалаба қозонганди.

Шу тариқа жамоалар қўшимча бўлимларга мурожаат қилишга мажбур бўлди. Қўшимча бўлимларда “Ан-Насср” бир киши кам бўлиб қолди. 98-дақиқада Айман Яҳё рақибга нисбатан қўполлиги учун қизил карточка билан жазоланди. 103-дақиқада эса БАА клуби футболчиси Султон учрашувда дурангни қайд этувчи, умумий ҳисобда эса “Ал-Айн”га устунлик берувчи гол муаллифига айланди.

118-дақиқада эса Криштиану Роналду пенальти ишлаб олди. Зарбасини эса португалиялик футболчининг ўзи берди ва ҳисобни 4:3 кўринишига олиб келди. 

Умумий ҳисоб 4:4 кўринишида якунланди ва ғолиб номи пенальтилар сериясида аниқланадиган бўлди. Пенальтилар сериясида эса “Ал-Айн” 3:1 ҳисобида зафар қучиб, ярим финалга йўл олди. Ар-Риёд жамоаси таркибида фақатгина Роналду 11 метрлик зарбани аниқ амалга оширди. Брозович, Теллес ва Отавионинг зарбалари ноаниқ бўлди. 

ОЧЛ

1/4 финал баҳси

11 март, душанба

“Ан-Насср” – “Ал-Айн” 4:3 

Пенальтилар серияси: 1:3

Голлар: 0:1 – 28 Раҳими, 0:2 – 45 Раҳими, 1:2 – 45 Ғариб, 2:2 – 51 Эиса (автогол), 3:2 – 72 Теллес, 3:3 – 103 Алшамси, 4:3 — 118 Роналду (пенальти).

“Ан-Насср”: Ал-Нажар, Ал-Авжами, Ал-Фатил (Ал-Сулайҳим, 90; Ал Немер, 105), Ал-Амри (Яҳё, 64), Теллес, Брозович, Отавио, Ал-Ҳайбари, Мане, Ғариб (Ал-Ҳассан, 84), Роналду.

“Ал-Айн”: Эиса, Ҳашеми, Отонне, Эрик (Саид Жума, 70), Абдулла Ҳасан Ал Балоуши (Муҳаммад Абдуллоҳ Аббас, 78), Паласиос, Пак Ен У, Надер (Алшамси, 99), Муҳаммад, Ромеро, Раҳими.

Огоҳлантиришлар: Эрик (32), Абдулла Ҳасан Ал Балоуши (38), Брозович (45), Мане (71), Отавио (84), Раҳими (85).

Четлатиш: Яҳё (98).