Шимолий Европадаги АҚШ ядро қуроли жойлаштирилган объектлар Россия ва НАТО ўртасидаги тўғридан-тўғри ҳарбий тўқнашув юзага келган тақдирда, биринчи ҳужум нишонларига айланади. Россия Ташқи ишлар вазирлиги матбуот котиби Мария Захарова шу тўғрисидаги баёнот билан чиқди. Бу ҳақда ТАСС нашри маълум қилмоқда.
“Бундай объектлар тўғридан-тўғри таҳдид манбаи бўлиши мумкинлигини ва табиийки, мамлакатимиз ва НАТО ўртасидаги тўғридан-тўғри ҳарбий тўқнашув юзага келганда нишонлар рўйхатига киритилишини тушуниш учун ҳарбий стратег бўлиш шарт эмас”, — деган Захарова.
Россия расмийсига кўра, агар АҚШ ядро қуроли Шимолий Европага жойлаштирилишда давом этса, бу қуроллар жойлаштирилган давлатлар хавфсизлиги ҳеч қачон мустаҳкамланмайди, аксинча, хавф остида бўлади.
Мария Захарова қўшимча қилишича, Финляндиянинг НАТО таркибида бўлиши ҳамда Ғарб қўшинлари иштирокида ўз ҳудудида ҳарбий машғулотлар ўтказиши мамлакатнинг хавфсизлик кафолати бўла олмайди. Аксинча, кескинлик юзага келган тақдирда унинг елкасига катта масъулият ташлаб қўйиши мумкин.
Изоҳ (0)