Шмигал: “Украина жорий йилда 37 миллиард доллар миқдорида ёрдамга муҳтож”

Украина 2024 йилда камида 37 миллиард доллар молиявий ёрдамга муҳтож. Бу ҳақда Украина бош вазири Денис Шмигал матбуот анжумани чоғида маълум қилди.

“Охирги икки йилда биз хориждан 75 миллиард доллардан ортиқ ёрдам олдик. Аслида, биз мудофаа хавфсизлиги эҳтиёжлари учун фақат ички ресурсларни сарфлаймиз”, — деди у.

Унинг сўзларига кўра, тўғридан тўғри бюджетни қўллаб-қувватлашнинг асосий донорлари Европа Иттифоқи, АҚШ, ХВФ, Япония, Канада, шунингдек, G7 нинг бошқа давлатлари ҳисобланади.

“Биз 2022 йилда тахминан 37 миллиард доллар йиғдик. 2023 йилда 42 миллиард доллардан кўпроқ маблағ тўпладик. Бу йилги режа ҳамкорларимиздан камида 37 миллиард долларлик ёрдамни жалб қилишдир”, — деди Шмигал.

Унинг қўшимча қилишича, бу йил Украина бюджети тақчиллиги Украина ялпи ички маҳсулотининг 20 фоизидан ортиғини ташкил этади — 37 миллиард доллар.

Ҳозирда Украина Европа Иттифоқидан 17,3 миллиард доллар ёрдам кутмоқда.