Ўзбекистонда электр тармоғидан ўғринча фойдаланиш бўйича яна 3 та ҳолат фош этилди

Ўзбекистонда электр энергиясидан ноқонуний фойдаланиш бўйича яна 3 та ҳолат фош этилди.

Бош прокуратура ҳузуридаги департаментнинг Қўшработ туман бўлими томонидан ўтказилган терговга қадар текширувларда “Ж.И.” фермер хўжалиги ва “С.П.” МЧЖ масъул шахслари сув насослари ҳамда янги қурилаётган бинони иситиш печлари ҳамда бошқа электр жиҳозларни ҳеч қандай ҳужжатсиз тижорат мақсадида умумий фойдаланишдаги электр тармоғига ўғрилик йўли билан улаб, жами 256,8 миллион сўмлик электр энергиясидан ноқонуний фойдалангани аниқланган.

Шу каби, департаментнинг Термиз туман бўлими томонидан “Ўзэнергоинспекция” ходимлари билан ҳамкорликда ўтказилган терговга қадар текширувда Денов тумани йўллардан фойдаланиш унитар корхонаси масъул шахслари “Айритом” МФЙ ҳудудига ўрнатилган янги кўча чироқларини ҳеч қандай ҳужжатсиз умумий фойдаланишдаги электр тармоғига тўғридан тўғри улагани оқибатида жами 169,1 миллион сўмлик электр энергиясидан ноқонуний фойдаланилгани аниқланган.

Департаментнинг Қўқон шаҳар бўлими томонидан ўтказилган терговга қадар текширувда эса, фуқаро Х.И. ва бошқалар “Мингтут” МФЙда жойлашган ўқув маркази биносини ҳеч қандай ҳужжатсиз тижорат мақсадида умумий фойдаланишдаги электр тармоғига ўғрилик йўли билан улаб, жами 146,5 миллион сўмлик электр энергиясидан ноқонуний фойдалангани аниқланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.