Британиялик мафтункор санъаткор Адель март ойида The Colosseum театрида бўлиб ўтиши режалаштирилган концерт дастури қолдирилганини ижтимоий тармоқ саҳифасида эълон қилди. Хонанданинг март ойида 10 та концерт бериши режалаштирилган эди.
Кетма-кет гастроль сафарлари ва дам олишсиз иш кунлари хонанда соғлиғига салбий таъсир ўтказган. У шифокорлар кўрсатмасига биноан барча ишларини ортга суришга ва соғлиғи билан жиддий шуғулланишга қарор қилди.
Аделнинг сўзларига кўра, у охирги концерт дастурида касал ҳолда ҳам қўшиқ айтган. Маълум вақт ўтгач тўлиқ тузалмаган ва яна концерт дастурларини давом эттирган. “Афсуски, буларнинг барчаси овозимга ўз таъсирини ўтказди”, — дейди хонанда.
Хабар сарлавҳасида Адель қўшимча қилди:
“Мен барчангизни яхши кўраман ва соғиниб қоламан. Келтирилган ноқулайликлар учун узр сўрайман”.
Март ойида Адель ҳар жума, шанба ва якшанба кунлари жами 10 та концерт бериши лозим эди. Бир оз танаффусдан сўнг санъаткор 17 майдан 15 июлга қадар яна концертлар ташкил қилмоқчи. Август ойида эса Мюнхенга гастроль сафари режалаштирилган.
Шунга ўхшаш ҳолат 2022 йил январь ойида юз берган. Адель сўнгги 5 йиллик фаолиятида Лас-Вегасдаги илк жонли ижро концерти ҳам ортга сурилган эди. Бунга Адель ҳамкасблари ва ёрдамчилари орасида коронавируснинг тарқалиши ва жамоавий касалликка чалингани сабаб бўлган.
Изоҳ (0)