Транспорт прокуратураси туризм фаолиятини амалга ошириш билан шуғулланувчи бир нечта субъектларининг фаолиятини тўхтатишни сўраб Туризм қўмитасига хат йўллагани тўғрисида хабар берилганди. Қўмита мазкур ҳолатга муносабат билдириб, туристик корхоналар таҳлил қилинганини билдириди.
Қайд этилишича, мазкур хат хусусий авиакомпания парвозларининг кечикиши натижасида умра тадбирлари вақтида моддий ва маънавий жабр кўрган фуқаролардан олинган маълумотлар асосида юборилгани маълум бўлган.
Мазкур мурожаат хатида келтирилган дастлабки туристик корхоналар ҳақидаги маълумотларга аниқлик киритиш мақсадида Туризм қўмитаси томонидан Транспорт прокуратурасига мутахассис ажратилган.
Бугунги кунда тадбиркорлик субъектларига кенг имкониятлар яратилиб, ҳукумат томонидан катта имкониятлар бериб келинмоқда. Шу боис, амалдаги қонунчиликка асосан фаолият олиб бораётган туристик корхоналарга ноқулайлик туғдирмаслик мақсадида, Транспорт прокуратураси билан биргаликда жиноят ишига алоқадор бўлган туристик корхоналарнинг идентификация рақамига (СТИР) аниқлик киритиш ишлари олиб борилмоқда.
“Ҳолат юзасидан алоқадор бўлган туристик корхоналарнинг идентификация рақамларини (СТИР) аниқлаш ишлари якунланганидан сўнг жиноят иши очилган корхоналарнинг фаолияти вақтинчалик тўхтатиб турилишини маълум қиламиз”, — дейилади муносабатда.
Аввалроқ Panorama Airways томонидан парвозларнинг кечикиши туфайли Ўзбекистон фуқаролари умра сафаридан қайта олмаётгани ҳақида хабар берилган эди. Бош прокуратура ҳолат юзасидан жиноят иши қўзғатилган.
Изоҳ (0)