“Ҳудудий электр тармоқлари” АЖ мутасаддилари, Тошкент ҳудудий филиали Қибрай туман электр таъминоти ходимлари ҳамда ДХХ, Бош прокуратура ҳузуридаги департаментнинг туман бўлими вакиллари ҳамкорлигида Қибрай туманида ўтказилган навбатдаги рейд тадбирлари ўтказилди.
Тадбирлар давомида “Байтқўрғон” МФЙ ҳудудидаги хонадонда яшовчи С.М. ўз уйида 3 дона майнинг криптоактив қурилмаларини тижорат мақсадида умумий фойдаланишдаги электр тармоғига ўзбошимчалик билан улаб, жами 579,4 миллион сўмлик электр энергиясини ўғирлагани аниқланган.
Шунингдек, рейд давомида Мирзо Улуғбек тумани “Алишеробод” ҳудудидаги хонадонда яшовчи Ф.Р. ўз уйида 4 дона майнинг криптоактив қурилмаларини тижорат мақсадида электр таъминоти корхонаси “Электрҳисоб” ДКдан рўйхатдан ўтказмасдан электр тармоғига ўзбошимчалик билан улаб, жами 365,2 миллион сўмлик электр энергиясини ўғирлагани маълум бўлди.
Мазкур ҳолат юзасидан ҳуқуқбузарга электр энергиясидан ноқонуний фойдалангани учун 63,6 миллион сўм қайта ҳисоб-китоб қилинган ҳамда ноқонуний фойдаланилган майнинг фермаларига нисбатан 5 баробар ўсувчи коэффициент қўлланиб, 944,6 миллион сўм маблағ ундиришга ҳужжатлар расмийлаштирилган.
Мазкур ҳолатлар юзасидан далолатномалар расмийлаштириб, тўпланган ҳужжатлар ҳуқуқни муҳофаза қилувчи органларга тақдим этилган.
Аввалроқ пойтахтда электр энергиясига ноқонуний тарзда уланиб, 1,5 миллиард сўмлик зарар етказган майнинг ферма аниқлангани тўғрисида хабар берилганди. Шунингдек, Жиззахда иккита майнинг ферма давлатга салкам ярим миллиард сўм зарар етказгани маълум бўлган эди.
Изоҳ (0)