Экопартия Энергетика вазирлигини Тошкент ИЭС бўйича аниқ чоралар кўришга чақирди

Ўзбекистон Экологик партияси Тошкент ИЭС атмосферага чиқараётган ташланмалар бўйича ҳукумат, бош прокурор ва икки вазирга депутатлик сўрови юборди.

Сўнгги кунларда ижтимоий тармоқларда Тошкент ИЭС акциядорлик жамияти томонидан ишлаб чиқариш жараёнида Тошкент шаҳри ҳавосининг ифлосланишига сабаб бўлувчи зарарли моддалар чиқарилаётгани жамоатчилик томонидан кенг муҳокама қилинмоқда.

Партия матбуот хизматининг маълум қилишича, мазкур ҳолат бўйича 22 февраль куни Экология, атроф-муҳитни муҳофаза қилиш ва иқлим ўзгариши вазирлиги, Бош прокуратура вакиллари ҳамда Олий Мажлис қонунчилик палатаси депутатлари иштирокида ишчи гуруҳ тузилиб, ўрганиш ишлари олиб борилди.

Ўрганиш давомида Тошкент ИЭС акциядорлик жамиятида электр энергияси ва иссиқлик энергияси узилишларининг олдини олиш мақсадида мазут ёқилғисидан фойдаланилаётгани маълум бўлди.

Шунингдек, электр энергияси ишлаб чиқариш бўйича мавжуд ускуналарнинг маънан эскиргани, атмосфера ҳавосига зарарли моддалар ажралиб чиқишининг олдини олишга хизмат қиладиган технологияларга зарурат борлиги ҳам аниқланган.

Мазкур ҳолатдан келиб чиқиб ишчи гуруҳ томонидан қуйидаги мазмундаги тавсиялар берилган:

• корхонада атмосфера ҳавосига чиқарилаётган ташламалардан намуналар олиш ва таҳлил қилиш учун автоматик тизимларни жорий қилиш;
• станциядаги қувурларга атмосфера ҳавосини ифлослантирувчи моддаларни камайтирувчи филтрлар ўрнатиш;
• атмосфера ҳавосининг ифлосланиш даражасини аниқлаш учун стационар кузатув постларини ўрнатиш;
• станциядаги нефть маҳсулотлари билан ифлосланган сувларни бирламчи тозалаш ҳовузи маънан эскирганлиги сабабли капитал таъмирлаш ишларини олиб бориш.

“Берилган таклиф ва тавсияларнинг Тошкент ИЭС акциядорлик жамияти томонидан ишлаб чиқариш жараёнига жорий қилиниши юзасидан Энергетика вазирлигидан аниқ чораларни кўришни сўраймиз”, — дейилади партия хабарида.

Бундан ташқари, Тошкент ИЭС томонидан атмосферага чиқариладиган ташланмаларнинг йўл қўйиладиган доирадаги меъёрларига риоя этишда қонун талабларига риоя қилинганлик ҳолати ҳамда ушбу ташкилот раҳбарияти ҳаракатлари қонунийлиги юзасидан Экологик партия фракцияси депутатлари томонидан Вазирлар Маҳкамасига, бош прокурорга, энергетика вазири ва экология, атроф-муҳитни муҳофаза қилиш ва иқлим ўзгариши вазирига депутат сўрови юборилган.

Улардан асослантирилган тушунтириш бериш, ўз нуқтайи назарини баён этиш сўралган.