Шайха Моза бинт Носир ал-Миснид Қатарнинг учинчи амири Шайх Ҳамад ибн Халифа ал-Танийнинг иккинчи аёли, етти (!) фарзанднинг онаси, дунёдаги энг замонавий биринчи хоним, сиёсий ва ижтимоий фаол давлат арбобидир.
Моза хоним таълим ва маданият жамғармаси раиси, турли хайрия ташкилотлари раҳбари ва шунчаки гўзал аёл сифатида танилган. Унинг номи кўплаб лойиҳа ва маданий ташаббуслари, шунингдек, Лондондаги энг ҳашаматли саройи билан ҳам боғлиқ.
Шайха Моза Буюк Британияга ташриф буюрганида Лондондаги уйида қолади. Унинг кўплаб ҳашаматли турар жойлари бўлишига қарамай, бу сарой алоҳида эътиборга лойиқ. Бино Сент-Жон-Вуд туманининг нуфузли ҳудудида жойлашган ва тахминан 6000 м² майдонни эгаллайди.
Бир неча йиллар аввал шайха Лондонда учта ҳашаматли уй сотиб олди ва уларни қасрга айлантирди. 13 хонали саройда барча шароитлар муҳайё: сартарошхона, массаж хоналари, йирик сузиш ҳавзаси, спорт зали, кўнгилочар хона, лимузинлар гаражи – буларнинг бари фақат минус биринчи қаватда!
Шайха Мозанинг дабдабали уйи қандай кўринишда?
Ташқи томондан уй ҳақиқий саройга ўхшайди. Фасадлар оч рангли тошдан ясалган ва нафис элементлар билан безатилган. Кенг дераза ва эшиклар ичкаридан боғнинг ажойиб кўринишини очиб, максимал ёруғлик ва тоза ҳаво билан таъминлайди.
Тўрт қаватли уйда барча қулайликлар ва ҳашамат мавжуд: қимматбаҳо гиламлар, суратлар билан безатилган кенг хоналар, нафис мебель ва идиш-товоқлар, ҳар қандай истагингизни бажаришга тайёр бўлган хизматчилар сизга мунтазир.
Сарой ичида нима гап?
Уйга кириб келишингиз билан сизни ҳашаматга тўла муҳит кутиб олади: деворлар турли мозаика ва расмлар билан безатилган, полларга қимматбаҳо гиламлар тўшалган. Аксарият мебеллар ҳақиқий ёғочдан ясалган бўлиб, олтин ва кумуш билан қопланган.
Биринчи қават меҳмонхона, ошхона ва катта зиёфат залидан иборат. Иккинчи қаватда дам олиш жойлари, чекиш зонаси (ҳа, бундай хона ҳам бор экан) ва учта кўнгилочар хона мавжуд.
Учинчи қаватда ётоқхоналар, гардероб хоналари ва офис жойлашган. Охирги қават болалар учун мўлжалланган: ундан кенг ўйингоҳ, болалар майдончаси ва энагалар хонаси ўрин олган.
Саройнинг бир қисми ишчилар учун алоҳида зонадан иборат: умумий ошхона, хавфсизлик идораси, видео-кузатув пункти ва бошқалар шулар жумласидандир.
Изоҳ (0)