Бухоро вилояти Пешку ва Ғиждувон туманларида барпо этилаётган иккита шамол электр станцияси учун 73 та турбина ўрнатиб бўлинди, деб хабар бермоқда Энергетика вазирлиги матбуот хизмати.
Маълум қилинишича, ҳар бир турбина минорасининг баландлиги 100 метр, шамол парракларининг ҳар бири эса 84 метрни ташкил қилади. Жами 158 та шамол турбиналари ўрнатилади. Ҳар бирининг қуввати 500 МВтдан бўлган ушбу икки (жами 1000 МВт) шамол электр станцияси Саудия Арабистонининг АCWА Power компанияси томонидан қурилмоқда.
Мазкур лойиҳалар доирасида Хитойнинг Envision компанияси томонидан қуввати 6,5 МВтдан бўлган шамол турбиналари ўрнатиляпти. Ҳозирги кунга қадар жами қуввати 474,5 МВтга тенг бўлган 73 та шамол турбинаси ўрнатиб бўлинди.
Мазкур электр станцияларининг дастлабки 400 МВт қуввати 2024 йил якунига қадар ишга туширилади.
Станциялар тўлиқ ишга туширилгач, йилига 3 миллиард 600 миллион кВт/соат электр энергияси ишлаб чиқарилади. Бунинг натижасида йилига 1 миллиард 100 миллион кубометр табиий газ тежалишига эришилади ҳамда атмосферага 1,5 миллион тонна зарарли газлар чиқишининг олди олинади.
Шунингдек, ушбу лойиҳалар доирасида узунлиги 260 километр бўлган 500 кВ кучланишли электр узатиш тармоқлари ва иккита 500 кВ кучланишли очиқ тақсимлаш ускуналари қурилади.
“Мазкур электр узатиш тармоқлари энергетика тизимининг шимоли-ғарбий (Қорақалпоғистон Республикаси ва Хоразм вилояти) ҳамда жануби-ғарбий (Бухоро ва Навоий вилоятлари) қисмларининг боғланишини мустаҳкамлайди”, — дейилади хабарда.
Маълумот учун, Навоий вилоятининг Томди туманида ҳам 500 МВт қувватли шамол электр станцияси қурилмоқда ва унинг ишга туширилган дастлабки қувватлари ҳозирги кунда “яшил” энергия ишлаб чиқармоқда.
Изоҳ (0)